Don 11 ngut ki Myntri ka Sorkar Nagaland kiba dei ki crorepati

Kohima, Lber:

Kat kum ka jinglum jingtip jong ka Nagaland Election Watch bad ka Association for Democratic Reforms, kaba la khmih bniah ïa ki kot pynshisha ne ‘affidavit’ jong baroh 12 ngut ki Myntri ka Sorkar Nagaland kynthup ïa u Myntri Rangbah ka jylla – Neiphiu Rio ka la shem ba haduh 11 ngut ki Myntri ki dei ki heh spah kiba kot kyrdan kum ki klurpati.

Na ka jinglum jingtip la ïathuh ba ka ‘average asset’ ne ka jingdon jingem ba pdeng jong ki 12 ngut ki Myntri ka Sorkar Nagaland ka long kumba T.10.58 klur. U Myntri uba bun tam ka jingdon jingem u dei u Myntri Rangbah ka jylla – Neiphiu Rio na Northern Angami-II (ST) ha kaba ka jingdon jingem jong u ka la kot shaduh ka T.46.95 klur.

U Myntri u ba duna tam ha ka liang ka jingdon jingem u dei u P. Paiwang Konyak na Tizit (ST) ha kaba ka jingdon jingem jong u ka long tang kumba T.67.84 lak. La shem ruh ba 8 ngut ki Myntri ki dei ki nongmihkhmat kiba dang hapdeng ka klas VIII bad klas XII, katba 4 ngut kiwei pat ki dei kiba la pyndep ïa ka ‘graduation’.  Napdeng ki 12 ngut ki Myntri, ka Kynhun Myntri jong ka sorkar jylla Nagaland ka don ruh ïa kawei ka Myntri kaba dei ka kynthei.

Kat kum ka jinglum jingtip la ïathuh ba napdeng kitei ki 12 ngut ki Myntri, ym shym la don satia uwei napdeng jong u ba don dak saw ha ki kam beaiñ.