Guwahati, Lber:
Ka Gauhati High Court ha ka 10 tarik mynta u bnai ka la hukum ïa ka Sorkar Pdeng ba ka dei ban siew ïa ka bai lut ksan kaba mar T.20 lak sha ki longïïng jong ki 5 ngut ki samla kiba la shah pynïap ha ki bor shipai ha ka thaiñ Tinsukia District ha u snem 1994.
La ïathuh ba ki shipai ka tnat Indian Army ki la pynïap ïa kitei ki 5 ngut ki samla ka thaiñ Tinsukia District ha ka jingleit khynra lehnoh ka jong ki ha u snem 1994.
Kat kum ka jingïathuh jong ka ‘counsel’ jong ki nongwan pynrung ‘petition’ – Pari Barman ka la pyntip ruh ba ka High Court ka la pynbna ban pynkut noh ïa ka mokotduma namar ka dei ka mokotduma kaba la slem bad kaba wanrah ïa ki jingeh ha kaba ïadei ban pynbiang ïa ki sakhi sabut. Ka Pari Barman shuh shuh ka la ïathuh ba ïa katei ka hukum la pynmih hadien ba ka ‘division bench’ jong u Justice Achintya Malla Bujor Barua bad Robin Phukan ki la khmih ban jngoh bniah ïa katei ka mokotduma.
Na ka liang ka Pari Barman ka la pyntip ba ïa katei ka mokotduma la pynkut noh bad na ka liang ka ïing kashari ka la hukum ïa ka Sorkar Pdeng ba ka dei ban siew ïa ka bai lut ksan kaba mar T.20 lak sha ki longïing longsem jong kitei ki 5 ngut ki samla kiba la shah pynïap.
Kat kum ka jinglum jingtip la ïathuh ba katei ka mokotduma kaba la bishar ha katei ka sngi ka dei halor ka jingshah pynïap jong ki 5 ngut ki samla kiba dei napdeng ki 9 ngut ki dkhot jong ka All Assam Students’ Union (AASU) kiba la shah tan ha ki bor shipai ka Indian Army na ka shnong Doomdooma ha u bnai Rymphang jong u snem 1994, hadien ka jingjia shah pynïap jong uwei u nongpynïaid kper sla sha ha ki dkhot jong ka seng kieng atiar ULFA.
Hadien katei la ïathuh ba na ka liang u nongïalam barim jong ka AASU – Jagadish Bhuyan hadien ba u la ïoh ban bat ïa ka shuki Myntri Sorkar Jylla u la leit ban pynrung da ka mokotduma ‘habeas corpus; hakhmat ka ïïng kashari na ka bynta ka suk ka saiñ ka jong kitei ki 9 ngut ki samla kiba la shah rah ha ki bor shipai. Hadien katei ka jingpynrung mokotduma la ïathuh na ka liang ki bor shipai ki la wan ban pynphai ïa ki 4 ngut ki samla kiba dang im bad hadien pat ïa ki metïap jong ki 5 ngut ki samla.
Halor katei ka jingshah pynïap jong kitei ki 5 ngut ki samla la ïathuh ba ki la don haduh 7 ngut ki shipai na ka 18 Punjab Regiment (Dhola camp) kiba la shah tian bishar bad shah rai pynrem ruh da ka jingshah set phatok shirta jingim na ka daw jong ka jingdonkti jong ki ha katei ka kam bymman. Ïa ki la tian bishar bad rai pynrem da ka Army court ha u snem 2018.
Ha ka 10 tarik mynta u bnai, na ka liang ka Pari Barman ka la pyntip ruh ba ka ïing kashari ka la bthah ïa ki district judge jong ka thaiñ Tinsukia District, Assam ba kin leit wad bad lum jingtip ïa ki bahaïing jong kitei ki samla ki ban shimti ïa katei ka bai lut ksan hapoh ki 15 sngi. Ïa katei ka bai lut ksan yn aiti aha ka high court hashwa ban pynbiang ïa ki bahaïing jong kitei ki samla kiba shah pynïap.
