Jowai, Lber 12:
Ki pulit pynlip ding ki la hap ban leit bran-bran ban pynlip ïa ka ding shwa ba kan pur sha ka shlem treikam jong ka Sorkar Pdeng ha nongbah Jowai ha ka miet Sngi U Blei.
Kane ka ding ka la sdang na u ñiut uba la lang ha lynti ban leit sha Thomas Jones Synod College bad haduh mynta ym pat tip satia kumno utei u ñiut u la kem ding syndet bad mano ba la thang.
Utei u ñiut u dei ba la lum thup ha ka surok kaba ki kali kamai Shillong-Jowai ki pynlong jaka ap briew.
Ha syndah kane ka surok kaba la kylla long ka jaka bret ñiut ka don ka Post Office bad ka shlem treikam BSNL bad ka ding ka la pur sted shaduh shajan kynroh ka Post Office.
Hynrei na ka daw jong ka jingwan poi kloi ka kali pynlip ding, la lah ban pynlip noh ïa katei ka ding.
