Bertina Lyngdoh
Ka jingiatan te kaba iakhaid, haba u paitbah hi ula pyniapait. Ka la long thik kum kata ka longkmie ka bym tei la ka iing, bad kumta ki khun ki kti kila sakma ha ka jingbym biang u nongsharai. Ka jingiatan tyllai kata ha kaba ia dei bad ka jingialehkai spot kaju long ka jing-iakhun kynthei para kynthei bad shynrang para shynrang. Hynrei ha kum kane ka jingiatan tyllai, kam long shuh kum kata ka jingialehkai tan tyllai lehkai spot. Uba don la ka buit, ka bor, bad uba skhem hala ka nongrim, u tan lut shalade na ka bynta ban ioh thung rishot ka san snem. Ki katto katne kita kum ka pynshoi, ka pynbiej, ka jingiakynad, bad kiwei de ki kam thamula ki long kita ki jingthaw pynkulmar ia ka jingthaw sorkar lane ka synshar paitbah.
Ha kine ki sngi,la sakhi ia ka jingjied nongmihkhmat ka jylla Meghalaya. Haduh mynta mynne, u Khasi Pnar u dang long hi uba rit pait bad uba dang sahdien ruh ha kiba bun ki liang. Kaba shisha ruh ka long ba ka jingiatyllilang hapdeng u Khasi Pnar ka la duna bha khamtam ha ka pateng ba mynta. Sanphew snem kynthi ba ka Meghalaya ka la ioh ia ka jylla bva pura jong ka, ki sengsainhima ne ki sengsain pyrthei ruh kila nang bun. Kine, kila long kum ka kmie u Kpa bad u paitbah pat u long kum ki khun ki kti. Ka jylla jong ngi ka la ioh ia katto katne ki seng riewlum hynrei kaba sngewsih pat ka long ba kum ki riewlum ngi khlem pyneh la ka daw na ka ban pynieng iaki. Kane kein ka dei ba ngi la shu bud tynneng bad ai ba ki riew ehrang jong ngi kin jah klep noh.
Ka jingshah ialam bakla ia ki nongjied nongmihkhmat barabor hi ka long ba ngi jied tang namar ka jingmyntoi shimet khlem pyrkhat pat iaka lawei ka jaitbynriew kaba shitroh. Baroh ngi kwah ia ka jingkylla hynrei kata ka jingkylla kan urlong tang lada ngi long kita kiba stad ba shemphang ban jied ia u nongmihkhmat. Ka jingsngewtynnad jong uba bun ka long ba ia kito kiba la mang la jied ba ki dei ban long kita kiba shlur ban iasait na ka bynta u paitbah kata sha ka iing dorbar thawain.Kum ki nongjied nongmihkhmat, ngi don ia ki hok ban jied ia uba ngi ibit, hynrei ka ju jia pat ba haba ngi jied ngi khlem da pynshong nongrim bha bad dei namar kane ka sa don ka jingiapait ia pra na kaewei ka seng ne ka party sha kawei pat. Dei namar kane, ba haba kut, ngi sakhi ba seng riewlum ki ioh duna bha ia ka Shuki sha ka iing dorbar thawain.
Namarkata, haba ngi la rai bad jied, kam myntoi shuh ban kylla la ka jutang. Ka jingkhein ba ngin ai kam dei para briew hynrei ka dei ha u tei uba nalor. Pynkhraw la ka jutang, bad dei hangta ba ngi ka nong-rim kan skhem bad ba ngin lah pat ban pynieng bad pyneh la ka daw. Donkam ban jied janai, ka party ne u nongialam namar dei mangi hi kiba pynshong shuki iaki. U paitbah u dei uta uba pynshong shuki kumjuh ruh u ban weng shuki. Kumta, la dei te ban pyrkhat sani bha haei mynta ngi don bad aiu kine ki san snem kin long iangi.Kyrmen ba kumba u paitbah ula shaniah skhem kumta kein kin long.
