Shillong, Lber 12:
U Rev. P Hynñiewta u la pynpaw ïa ka jingsngewkhia kaba jur namar ka jingtuid ka pisa kum ka umsaw ha ka por ilekshon ka la rong noh ïa ki nongïalam.
Ïa kine ki kyntien u Rev. Hynñiewta u la kren haba sam ïa ka khubor na ka ktien jong U Blei sha ki paid riewngeit kiba la poi palat lak ngut ha ka jingïaseng Khasi Jaiñtia Presbyterian (KJP) Synod Sepngi kaba 21 jong ki Rangbah kaba la long ha ka Balang Presbyterian Lyngkhoi, Parïong Presbytery kaba hap ha Sohïong constituency, East Khasi Hills District kaba la sdang naduh ka 9 tarik bad pynkut ha ka 12 tarik Lber 2023 kaba dei ka Sngi U Blei.
U Rev. Hynñiewta hadien ba u la dep sot ïa ki dkhot kyntien na ka ktien U Blei ban sam sha ki paid riewngeit kiba wan sha kane ka jingïaseng, hashwa ba un pynkut ïa ka jingkren, u la pynkynmaw ïa ki jingkren uwei u nongïalam ka jylla u Prof. GG Swell hadien ba la khyllem ka sorkar APHLC ha Khasi National Dorbar Hall, Mawkhar uba la ong ïa kine ki kyntien, “Kynmaw ko para ri, ka spah kan sa wan tuid ha kane ka ri kum ka umsaw bad ha kata ka por kin sa rong noh ïa ki nongïalam”.
U Rev. Hynñiewta u la ong ba kane ka jingkren u Prof. GG Swell ka la urlong mynta ha kane ka ilekshon ba dang shu dep namar ka spah ka la tuid shisha kum ka umsaw namar ki nongïalam ki la ïa sam pisa bad ki paidbah ruh ki la ïa kmen haba ïoh pisa.
Une u Pastor u la sam ïa ka ktien U Blei da kaba sot na u Nongïathuhlypa u Amos ka lynnong 4 bad dkhot 12.
Ha ka jingïaseng ha ka por 10:30 mynstep la sam ïa ka khubor na ka ktien U Blei da u Pastor Dr. B.L Nongbri bad la pynrhem shuh shuh ïa kane ka jingïaseng da ka jingrwai na ka Jingïaseng Khynnah Balang Lyngkhoi, ki khun samla ka Balang Presbyterian Mawphlang, Parïong, Mawten, Lyngkhoi, Standing Choi Jingïaseng Samla Jakrem Photjaud Presbytery, Standing Choi Ri Lyngngam Presbytery, KJP Synod Sepngi Standing Choir.
Ka jingïaseng KJP Synod Sepngi kaba 22 ka ban long ha u snem 2024 kan dei ha Balang Presbyterian Laitryngew.
