Shillong, Lber 12:
U MP ka Rajya Sabha, Dr. W.R. Kharlukhi u la ban jur halor ka jingïatylli jong baroh 25 ngut ki MP ka thaiñ Shatei Lam Mihngi khnang ba ka nongbah Delhi kan shah shkor ïa ki mat jingdawa jong ki nongshong shnong ka thaiñ.
“Ngan ong ïa phi tang kane, ngan kren da kaba shai, ka thong jong u nongïalam jong ngi watla um don shuh, u P.A. Sangma (Bam Kwai ha Dwar U Blei), u la don la katto-katne por ha ki kam saiñ pyrthei ha Delhi, u ïohi ba lada ngi kum ka thaiñ Shatei Lam Mihngi ngim ïatylli, ngim lah ban leh eiei,” la ong u Dr. Kharlukhi haba kren sha ki lad pathai khubor ha ka Sngi Thohdieng.
Haba ai nuksa ïa ka kam Vice-Chancellor (NEHU), kata ban ïoh noh da u trai-ri, u MP u la pynkynmaw ba watla baroh 3 ngut ki MP ka Jylla ki la thoh sha ka Sorkar Pdeng (khlem da kheiñ ïa ka seng), ym shym la don mano-mano ruh ba sngap ïa ki.
U la ïathuh ba la rah ruh ïa katei ka mat ha ka ‘North East Forum’ ha kaba ki don la ki jong ki jong ki seng, hynrei kam shym la poi sha kaba la thmu.
“Mynta lada ngi don ka kynhun kaba khlaiñ bor, ka kynhun kaba na ka thaiñ Shatei Lam Mihngi…25 ngut ki MP, kin sa sngap ïa ki jingpynsngew jong ngi,” la ong utei u nongïalam.
U Dr. Kharlukhi u la kdew ruh ba ka jingïashrut para ’riewlum hapoh ka thaiñ ka lah ban dei na ki bor ba na shabar.
Shuh shuh u la bynrap, “Nga ïohi ba lada ngi ïapait-ïapra, ngin ym poi shano-shano. Ngi dei ban ïatylli kum kawei ka kynhun kaba khlaiñ bor bad ban leit ha Parliament. Ngi ngeit ha ka synshar paidbah, 25 ngut ki MP napoh ka thaiñ ha kajuh ka rynsan, ngan ong ïa phi, ha kata ka por kan sa kylla.”
Kum ban shu kdew hangne, ka rai ba la mynjur da ka ïingdorbar thawaiñ haba ïadei bad ka jingpyntreikam ïa ka Inner Line Permit (ILP) hapoh ka Jylla bad ka jingpynrung ïa ka Ktien Khasi bad Garo ha ka Khyrnit ba 8 jong ka Riti Synshar ka Ri ki dang don hapoh ka jingkhmih bniah jong ka Sorkar Pdeng.
