Shillong, Lber 12:
Ki dkhot ka KSU Umsning Circle ha ka nohphai sngi jong ka 12 tarik mynta u bnai ka la ïoh bat ïa ki bar Jylla ba khlem ki kot ki sla kiba biang kiba thmu ban wan bylla sha Ri-lum Jaiñtia.
Ka jingïoh bat ka seng ïa kitei ki bar jylla ka dei hadien ka jing-i-pher ïa ka rukom wan jong ki; kata haduh 2 bos kiba don ïa u nombor AS-01 GC 7338 bad AS-01 KC 5638.
Ïa kitei ki bar jylla kiba don palat 90 ngut la ïoh ban bat na ka thaiñ Umsning bad haba ka seng ka la kylli pyrthew, la lap ba ki dei ki bym biang kot biang sla.
“Ka KSU kumba ka la ju phah ka kyrwoh sha ka Sorkar Jylla bad Sorkar Pdeng ba kin pynkhlaiñ ïa ki aiñ ban pyrkhing ïa ki bar Jylla, hynrei kaba lyngngoh ka long ba wat hapoh ‘Infiltration Check Gate’, ki nongtrei kim da pyrkhing. Kitei ki bar Jylla ki la ïathuh ba ki siew tang T.4000 bad ki la ïoh ban rung laitlan bad poi shaduh Umsning,” la ong ka kyrwoh na ka seng.
Ka seng ka la ong ruh ba kitei ki bar jylla ki dei kiba thmu ban leit bylla be-aiñ sha ki karkhana pynmih dewbilat kiba don ha East Jaiñtia Hills.
“Ka jingïai kuman jong ka Sorkar Jylla ban pyrkhing ka pynlong ruh ïa ki distrik ba marjan bad ka Assam ban jur ki jinglute, jingtuh, khaïi drok bad bun ki runar ba thmu pynïap ïa ki mynsiem ba lui-lui kiba ngi la sakhi ha kine ki sngi ki taïew ba mynta,” la ong biang ka kyrwoh.
Ka seng kan pyndep bad shim ki sienjam bad ka maham tyngeh ïa ki nongai bylla ba mlien ban wanrah ïa ki nongtrei bar Jylla ba khlem ki kot ki sla kiba biang namar dei ma kiba pynshlur bad pynkheiñ ïa ka aiñ ‘Inter-state Migrants Workmen (Regulations of Employment and Conditions of Service) Act 2011’ kaba don la ki kyndon hapoh jong ka.
Hadien ba ki dkhot ka KSU Umsning Circle ki la tohkit, la wan shimti noh da ki pulit Umsning kiba la shimkhia ban leit pynphai ïa kitei ki bar Jylla bad ki pyntikna ruh ba kin leit pynphai noh ïa ki mardor sha Assam.
