New Delhi, Lber:
U President ka Congress u Mallikarjun Kharge ha ka sngi Thohdieng u la kynnoh ba ka sorkar jong u Narendra Modi ka la thmu ban leh da ka bor ha ryngkat ki jingbyrngem halor ka jingthmu ban pynïap ïa ka synshar paidbah da kaba pyndonkam bakla ïa ki kynhun tohkit pyrshah ïa ki heh nongïalam jong ka liang pyrshah, kumba u la kynthoh jur ïa ka sorkar kmie halor ka jingpynlong jong ka kynhun ED ïa ka jingleit khynra ha ki jaka sah bad ki jaka treikam jong ka longïing jong u Myntri Rangbah barim jong ka Bihar u Lalu Prasad Yadav.
Ka kynhun Enforce-ment Directorate ha ka sngi Thohdieng ka la pynlong ïa ka jingleit khynra ha kiba bun ki nongbah jong ka Bihar bad ha kiwei pat ki jaka, kynthup ha ki jaka sah jong ki bahaïing jong u Yadav bad jong ki nongïalam jong ka seng RJD, ha kaba ïadei bad ka jingshah kynnoh ba ki la donkti ha ka ban kamai ïa ka spah bymhok halor ka jingdon jong ka jingjia kaba la mih na ka jingïapeiñ jaka na ka bynta ka jingai kam sha ki nongthep kam.
Ka kynhun ED ka la kurup noh ïa ka pisa kaba T. 53 lak, USD 1,900, kumba 540 gram ka ksiar bad ki ksiar biskit bad 1.5 kg ki jingdeng ksiar, la ïathuh ka tyllong khubor kaba la wan na ka kynhun tohkit.
Kawei napdeng ki jaka ba la pynlong ïa ka jingkhynra ka dei ka ïing kaba don ha ki bynta ba shaphang Shathie jong ka Delhi ha kaba u khun jong u Lalu Prasad, uba dei u Symbud Myntri Rangbah jong ka Bihar u Tejashwi Yadav u don, ki la ong.
Kum shi bynta ban ong ei ei halor kane ka jingpynlong ïa ka jingleit khynra, u Kharge ha ka jingphah khubor lyngba ka Twitter u la ong, “Ha ki 14 kynta ba la leit, u Modi u la buh ïa ka kynhun ED ha ka ïingsah jong u Symbud Myntri Rangbah jong ka Bihar u Tejashwi Yadav.”
“Ka kurim jong u kaba dang pun khun bad ki para kynthei jong u ki la shah pyndik. U Lalu Prasad u dei uba la tymmen bad u bym don ha ka met kaba koit ba khiah, katta ruh ka sorkar jong u Modi kam don jingsngew ei ei ban pyrkhat ïa ka longbriew manbriew,” la ong u Kharge.
“Mynta ka um ka la shlei haduh khlieh,” “Ka sorkar jong u Modi ka la buh da ki jingbyrngem halor ka jingthmu ban pynïap ïa ka synshar paidbah da kaba pyndonkam bakla ïa ka kynhun ED-CBI pyrshah ïa ki nongïalam ka liang pyrshah,” u la pynshisha. Shano ki heh sorkar jong u Modi ki la phet rieh na kane ka ri ha ryngkat ka pisa kaba da ki klur tyngka, u la kylli.
“Haba ka spah jong ki paralok ba ïajan eh ka la kynjoh bneng, balei ba ym shym la don ka jingtohkit?” u la ong, ha kaba la thew ïa u heh spah u Gautam Adani, ïa kaba ka seng Congress ka la ong ba u la long u paralok ba ïajan bad u Narendra Modi.
“Ki paidbah kin sa ai da ka jubab kaba ïabiang halor kane ka jingsynshar donbor,” u la ong shuh shuh.
Ki jingleit khynra ki la long sha ki jaka sah bad ki jaka treikam jong ki khun kynthei jong u Lalu Prasad, ka Ragini Yadav, Chanda Yadav, bad ka Hema Yadav, u MLA barim jong ka RJD u Syed Abu Dojana, Amit Katyal, Navdeep Sardana bad Praveen Jain ha ki jaka kiba don ha Patna, Phulwari Sharif, Delhi-NCR, Ranchi, bad Mumbai, la ïathuh ki heh ba dei khmih.
