Shillong, Lber 12:
Ka Sorkar Pdeng ka la pynpaw ïa ka jingpyrshah halor ka jingshongkha shongman para kynthei ne shynrang (Same-Sex Marriage), bad kane ka la paw lyngba ka jingthoh lane ka ‘Affidavit’ ba ka la ai sha ka Supreme Court halor ki mukotduma kiba dawa ba dei ban ithuh da ka aiñ ïa ka jingshongkha para kynthei ne shynrang.
Katkum ka khubor ba la pynmih ha ka ‘Live Law’, kaba dei ka rynsan kaba pathai ïa ki khubor halor ki aiñ ki kanun, ha ka Sngi U Blei, ka Sorkar Pdeng ka la thoh ba ka jingshongkha hapdeng ki kynthei bad shynrang ka dei kaba la don nongrim ha ka shongkha ka shongman bad kam dei ban shah ktah da kino-kino ki jingbatai halor ka aiñ.
Ka la ong ruh ba baroh ki aiñ kiba ïadei bad ka shongkha shongman ki ithuh beit tang ïa ka jingïadei hapdeng u shynrang bad ka kynthei ha ka kam shongkha shongman. Haba ka la don lypa ka aiñ halor kane, ka jingtuklar da ka ïingbishar ban pynthymmai ïa ka aiñ ka long ka bym dei satia ban shah.
“Haba ki kyndon aiñ ki la batai shai da kaba pyndonkam ïa ka kyntien “shynrang” bad “kynthei”, ki ïingbishar kim lah satia ban ai da kawei pat ka jingmut,” la ong ka Sorkar Pdeng.
Shuh shuh ka Sorkar Pdeng ka la ong ym lah satia ban ïanujor ïa ka jingsahlang (Live-In) hapdeng para kynthei ne para shynrang bad ka nongrim jong ka longïing longsem kaba don u kurim, ka kurim bad ki khun kiba mih na ka jingïadei hapdeng shi kurim.
Watla ïa ka jingïadei (Homosexual Relationship) la kheiñ ba kim hap shuh kum kita ki kam be-aiñ lane kata ka ‘Criminal Offence’ hadien ba mih ka hukum jong ka ïingbishar halor ka mukotduma u Navtej Singh Johar, hynrei na kane pat, kam dei ban mih ka jingpynksan lane ka jingdawa ban ithuh da ka aiñ ïa kata ka shongkha shongman hapdeng para kynthei lane para shynrang.
Shuh shuh ka Sorkar Pdeng ka la ong ba naduh mynnor, ki aiñ ki kanun ki ithuh beit tang ïa ka jingshongka shongman hapdeng u shynrang bad ka kynthei (Heterosexual Marriage). Ka la ong ruh ba lada ithuh da ka aiñ ïa ka shongkha shongman para kynthei ne para shynrang, kin mih ki jingeh bad ki jyrwit-jyrwat ha kaba ïadei bad ka jingting khun, jingpyllait san shyieng, jingshim pateng ïa ka jingdon jingem, jingsiew bai bam bad kiwei.
“Baroh ki aiñ ki kanun kiba ïadei bad kine ki mat ki jura la shna da kaba shim ba ka shongkha shongman ka dei hapdeng u shynrang bad ka kynthei, bad kan ym lah ban long ban pyntreikam ïa kine ki aiñ ki kanun ha kaba ïadei bad ka jingshongkha shongman para kynthei ne para shynrang,” la ong ka Sorkar Pdeng.
Nalorkata, ka la ong ba kan bha ban ieh ïa kiba kum kine ki mat ki jura ha ka kti jong ka Ïingdorbar Thawaiñ ha kaba yn lah ban ïatai halor kine bad kiwei pat ki mat kiba don jingïadei. “Kane kan pynthikna ba kan don ka jingïatai kaba sani bha halor kaei ka ban jia lada ai jingithuh ïa ka shongkha shongman kaba long para kynthei ne para shynrang,” la ong ka Sorkar Pdeng.
Ha kajuh ka por, ka Sorkar Pdeng ka la kren shai ba ka jingbym ithuh da ka aiñ ïa ka shongkha shongman para kynthei ne para shynrang kan ym ktah ïa ki hok tynrai lane ki Fundamental Rights kumba la buh ha ka Riti Synshar jong ka Ri.
