Kathmandu, Lber:
Ki doktor jong ka Nepal ha ka Sngi Thohdieng, ki la ioh ban sumar bad sei noh ia u bitor ‘Vodka’ na ka kpoh jong uwei u samla 26 snem bad uwei u briew u la shah kem halor ka jingdon kti ha katei ka kam dusmon.
La ong ba ia utei u bitor la lap lyngba ka ‘Scanning’ hadien ba utei u briew uba la tip kyrteng u Nursad Mansuri, u la ud suh bad pang ha ki bynta jong ka kpoh.
Kumta, la ioh ban sei noh ia utei u bitor na ka kpoh jong u hadien ka jingiakhun shitom kumba 2 kynta shiteng.
La ong ba utei u bitor u la pynkad ia ki snier jong u bad kaba la pynlong ia utei u briew ba un sngewthuh ia ka jingshitom bad jingpang shapoh ka met jong u.
Ki pulit ki la iathuh ba katkum ka jingpeit thuh, ki paralok jong u Nursad, ki lah ban leh ia katei ka kam dusmon ha ka por ba iadih lang bad u hi, da kaba pyndih buaid shuwa ia u bad hadien kata kin sa phrung pat ia utei u bitor shapoh ka met jong u.
Kumta, ki pulit ki la bat noh ia u Shekh Samim uba long u suba don kti ha katei ka kam runar bad ki la ioh ruh ban tohkit ia katto katne ngut ki paralok ba iajan bha bad u Nursad ha kaba ki la phla ia ka kyrteng u Samim.
