Guwahati, Lber:
Ka Sorkar jong ka jylla Assam ha ki khyndiat sngi kiba la leit noh ka la wanrah ïa ka ‘bill’ ha Ïing Dorbar Thaw Aiñ – ka ‘bill’ na ka bynta ban pyndait ïa ki kor CCTV ha baroh ki jaka kiba ju bun ki jingïalum paidbah khnang ban pyntikna ïa ka shong suk shong saiñ jong ki paidbah nongshong shnong ka jylla.
Kat kum ki jingïoh lum jingtip la ïathuh ba baroh ki trai jong ki jaka kiba don markhap bad kitei ki jaka ïalum paidbah ki dei ban pyndait ïa ki kor CCTV hapoh ka bor ba ka sorkar kan sa bthah, bad lada kim lah ban leh kumta, ki bor sorkar kin sa leit ban khang dam noh ïa kitei ki jaka.
Ïa ka “Assam Public Safety (Measures) Enforcement Bill, 2023,” la wanrah ha Ïing Dorbar Thaw Aiñ da u Myntri ka Tnat Housing & Urban Affairs jong ka jylla, u Ashok Singhal.
Ka thong kaba hakhmat eh jong katei ka aiñ ka long ban wanrah ïa ka shong suk shong saiñ jong ki paidbah nongshong shnong ka jylla khnang ba kin lait na kino kino ki kam shah thombor ha ki kynhun runar ha ki jaka paidbah kum ki iew, ki shlem trei kam, ki jaka mane blei, ki jaka pule, ki shlem trei kam sorkar, bad kiwei kiwei.La ïoh jingtip ruh ba ïa katei ka aiñ yn pyntreikam hapoh ka shi snem naduh ka tarik ba la pynbna ban wanrah ïa katei ka aiñ, lane ha ka tarik kaba ïadei bad ka jingleit pynthymmai ïa ki laisen na ka bynta ki shlem trei kam. Lada ki trai jaka ki leh pyrshah ïa katei ka aiñ, ka sorkar jylla kan daiñ kuna na ka bynta 2 bnai bad hadien kitei ki jaka kin shah khang tala shipor ha ki bor sorkar.
