Bengaluru, Lber:
Ki nongtrei jong ka State Transport ha Karnataka ki la rai ban pynlong da ka jingïakhih kaba khlem buh por ka ban sdang naduh ka 24 tarik, Lber halor ka jingdawa ban pynkiew ïa ka jingsiew tulop jong ki, ban dawa shuh shuh ha ka ban pynïoh ïa ki lad jingïarap bad halor kiba bun kiwei pat ki jingdawa.
Kane ka jingthmu jong kine ki nongtrei kan sa ktah shibun ïa ki nongleit nongwan kiba ju donkam ban leit jingleit man ka sngi,ckhamtam na ka jingdon jong ka II PU (Pre-University) Exams kaba dang ïaid mynta, la ïathuh ka tyllong khubor. Kane ka jingthmu pyntreikam ka la long ar bnai hashwa ban pynlong ïa ka ilekshon Assembly ha ka jylla.
Ki nongtrei sorkar ki la pynlong ïa ka jingïakhih kaba15 sngi halor ka jingdawa ba la dei ban pynkiew biang ïa ka tulop ha u Ïaïong jong u 2021, kaba la kot sha ki Million tyngka lada pynurlong ïa ka jingdawa bad kane ka la pynlong ïa ki heh ba dei khmih ban kin weng noh ïa palat 4000 ngut ki nongtrei kiba don ha ki saw tylli ki State Transport Corporations kiba don ha ka jylla kiba don bynta ha ka jingïakhih. Ka kynhun jong ki saw tylli ki Registered Transport Unions kiba kynthup ïa ka KSRTC, BMTC, NWKRTC bad KKRTC, ka la khot pynlong ïa ka ‘Sarige Nigmagala Noukarara Samana Manaskara Vedike’ ha kaba la ai da ki shithi sha u State Labour Commissioner.
Ka tyllong khubor ka la pynsngew ïa ka jingkren jong u nongïalam jong ka Union kaba la ong, “Ngi la rai ban pynlong da ka jingïakhih kaba khlem buh por naduh ka 24 tarik, Lber haduh ban da lah ban pynurlong ïa ki jingdawa jong ngi.” Ha kaba ïadei bad kane ka bynta,na ka liang ki heh jong ka Road Transport Corporation ki la ong ba ki la phah ïa ka shithi ha u Nohprah jong u snem ba la lah hapoh ka jingtreikam jong ka Karnataka Essential Services Management Act, 2013 kaba la khang pyrshah ha ka ban pynlong ïa ki jingïakhih na ka bynta ki hynriew bnai, kata naduh u Kyllalyngkot haduh u Jylliew jong u snem 2023.
