Shillong, Lber 13:
Ka Meghalaya High Court ha ka Lah Sngi U Blei ka la pynpaw ïa ka jingdonkam ïa 10 Company ki pulit Central Industrial Security Force (CISF) ban peitngor ha ki lynti ki syngkien ïa ka jingkit be-aiñ ïa u dewïong ha kane ka jylla.
Kane ka jingpynpaw na ka High Court ka long hadien ba ka sorkar jylla ka la ai da ka jingthoh ban wanrah da ki pulit Central Reserve Police Force (CRPF) ha jylla ban peitngor ïa ka jingtih bad jingkit be-aiñ ïa u dewïong.
“Katkum ka saiñdur jong ka sorkar jylla, ka kwah ban buh 100 Company ki CRPF ha Eastern Range (Khasi-Jaiñtia Hills) bad 60 Company ha Western Range (Rilum Garo), bad ha kawei ka Company, don 135 ngut ki CRPF,” la ong ka High Court.
Ka sorkar jylla ka la pyni ba ka donkam ïa ka pisa kaba T. 316 klur ban shna ïa ki jaka sah na bynta kitei ki pulit CRPF bad sa T. 58 klur ha ka shi snem na ka bynta ban pyndonkam ïa ki kali ban kit ïa kine ki pulit.
“Kan long ka kam kaba eh shibun ban pynsah shipor ïa 160 Company ki CRPF. Ha ka jingshisha, u dewïong uba don ha jylla u lah ban lut noh syndon kat haduh ka por ba ïa kane ka saiñdur jong ka sorkar jylla yn lah ban pyntreikam,” la ong ka High Court.
Hynrei, na ka liang ka High Court ka la ong ba kan kham biang lada pyndonkam 10 Company ki pulit CISF, bad ym ki CRPF. Ka daw ka long ba ki pulit CRPF ki treikam hapoh ka jingpeit jong ki pulit ka jylla, katba ki CISF ki trei khlem da shah pynïaid hano-hano. Halor ka jingkylli jong ka ïingbishar, ka Sorkar Pdeng ka la kdew ba ki CISF kin lah ban peitngor ïa ki kali kit mar.
Haba peit ïa ka jinglong jong ka jaka ha ka jylla, ka High Court ka la ong ba 10 Company ki pulit CISF ki la biang ban peit ïa ki kali bad ban khang syndon ïa ka jingkit dewïong be-aiñ. Nalorkata ka la ong ba ki pulit CISF kin peit ruh ïa ki kali kiba kit ïa ki mar be-aiñ bad ba ki kali kin bud ryntih ïa ki jingbthah ba kim dei ban kit palat pud ha ki surokbah.
Ka High Court ka la bthah ïa u muktiar ka Sorkar Pdeng ban peit ïa ki jingdonkam na ka bynta ban wanrah ïa 10 Company ki pulit CISF ki ban peitngor ïa ka jingkit dewïong be-aiñ ha Meghalaya. Ka la ong ruh ba ka jingpyndonkam ïa ki CISF kan ym long na ka bynta bun snem namar ka sorkar ka don jingthmu ban ailad ïa ka jingtih dewïong kaba pyndonkam da ki kor ki bor bad ka jingai laisen katkum ki kyndon aiñ kaba lah ban pynlong ïa ka kam tih dewïong kum ka kam ka bym khring than shuh ïa ki briew.
Shuh shuh ka High Court ka la pyntip ba u Justice (Retired) BP Katakey u la dep ai ïa ka kaiphod kaba 11 jong u ha kaba ka Sorkar Jylla bad Sorkar Pdeng ki dei ban pdiang.
Nalorkata, ka la ong ba ïa ka jingbuh ïa ki 10 Company ki pulit CISF yn sa pynbeit ha ka jingïamir jingmut lang bad u Justice Katakey. Hynrei ka High Court ka la kren shai ruh ba ka jingbuh ïa ki pulit CISF kan long da kaba siew da ka dor bad katkum ka jingïakren hapdeng ka Sorkar Jylla bad ka Sorkar Pdeng.
