Mexico, Lber:
Ki la don 10 ngut ki briew kiba kyllon iap na ka synreit kuli hapoh ka thaiñ Guanajuato jong ka Mexico, katba 5 ngut kiwei pat ki la mynsaw lang ha katei ka jingjia.
Kane ka la jia hadien ka por 11:00 jong ka miet Sngi Saitjaiñ hapoh ka jaka leh kmen ‘El Estadio’ lane ka ‘Bar’, ha kaba kawei ka kynhun jong ki riew kieng atiar, ka la leit ban rung jubor shapoh jong katei ka jaka leh kmen bad kitei ki dkhot na katei ka kynhun, ki la sei ia ki tiar siat jongki bad ki la synreit kuli naphang ia kat kiba don ha katei ka jaka naduh ki riew riewpaidbah haduh ki nongtrei jong katei ka jaka. Katei ka jaka leh kmen ka don ruh hapdeng ka surok bah kaba pyniasoh ia ka nongbah Celaya bad ka Queretaro.
Katkum ka kaiphod ba la ioh lum jingkheiñ halor ka jingkhlad ki briew na katei ka jingjia, tad haduh jong ka step Lah Sngi U Blei, la iathuh ba kitei kiba khlad baroh ki kynthup ia 7 ngut ki shynrang bad 3 ngut ki kynthei.
La ong ruh ba katei ka thaiñ Guanajuato, kaba long ka thaiñ kaba kham heh iew bha bad kaba don ia shibun tylli ki karkhana bad kaba long ruh ka jaka sah jong ki riewshangkai pyrthei ka Mexico, ha kajuh ruh ka por, ka long pat ka jaka kaba kham don jingma tam hapoh Mexico bad kaba ju mad khah khah ia kum kitei ki jingjia thombor na ka por sha ka por.
La ong ruh ba ki don ar tylli ki kynhun runar ha katei ka thaiñ, ka Santa Rosa de Lima bad ka Jalisco Nueva Generacion, kiba ju iakhun bad pyni bor man ka por hapoh katei ka thaiñ, ha kaba la ju bna ruh ba kitei ki long ki kynhun runar kiba ju pyniaid iew ia u drok ha katei ka jaka bad namarkata ruh ka jingtuh umphniang kali ka ju jur bha hapoh katei ka thaiñ.
