Imphal, Lber:
Ki bor pulit jong ka jylla Manipur ki la pyntip ba ha ki 36 kynta kiba la leit noh ki la ïoh ban kem ïa 4 ngut ki dkhot jong ki 2 tylli ki seng kieng atiar jong ka jylla.
Kat kum ka jingpyllait kyrwoh jong ka tnat shipai la pyntip ba haduh 3 ngut ki dkhot jong ka seng kieng atiar People’s Liberation Army (PLA) ki la shah kem na ka shnong Kakwa Nameirakpam Leikai, Imphal West district, bad na kitei ki runar ki bor pulit ki la ïoh ruh ban kurup ïa kawei ka pistol 9mm, 30 tylli ki kuli, 2 tylli ki ‘two magazine’, 2 tylli ki ‘hand grenade’ ba la shna ha ri China bad 3 tylli ki mobile.
Sa ha kawei ka jingïoh kem dkhot seng kieng atiar, ki bor pulit jong ka jylla ki la pyntip ba ki la ïoh ban kem ïa u dkhot jong ka seng kieng atiar Kangleipak Communist Party (N) na ka shnong T Leishang Kotland kaba don ha ka thaiñ Kangpokpi District.
U dkhot ka KCP-N u ba la shah kem ha katei ka sngi u dei u ba la tip kyrteng kum u Liren Chiru (23 snem ka rta) u ba la leit ban pynïasoh dkhot bad ka seng ha u snem 2022 bad pyndep ruh ïa ki jingshah ai jinghikai kilan met ha kawei ka ktem kaba don ha Myanmar.
Kat kum ka jingïathuh jong ki bor pulit, ki la pyntip ba dkhot ka KCP-N u ba la shah kem ha katei ka sngi u dei u runar u ba ju donkti ha bun tylli ki kam beaiñ ha ki thaiñ khappud jong ka jylla. U la donkti ha ki kam dawa pisa, ki kam pynïaid iew ïa ki tiar siat bad kumjuh ruh ha ki kam ban pynrung dkhot ïa ki samla ka jylla.
Ïa kitei ki 4 ngut ki dkhot seng kieng atiar kiba la shah kem ha katei ka sngi la leit ban aiti noh sha ki bor pulit jong ki thaiñ ba la ïoh ban kem ïa ki khnang ban pynlong ïa ki jingtohkit kiba dang sah.
