Shillong, Lber 13:
U President ka National People’s Party (NPP) Meghalaya, u Dr W.R Kharlukhi, u la ong ba ka NPP ka la sdang ban pynkhreh na ka bynta ka ilekshon MDC ka ban sa long ha u snem 2024 sha ka Khasi Hills Autonomous District Council bad Jaiñtia Hills Autonomous District Council.
U Dr. Kharlukhi, uba dei ruh u MP ka Rajya Sabha u la ong ba wat la ka NPP kam shym la lah ban ïoh ne jop bun ki MLA na Khasi Hills, hynrei kan leh bha ha ka ilekshon MDC.
Ha kaba ïadei bad ka jingmih ka Voice of the People Party (VPP) kaba dei ka seng saiñ pyrthei thymmai, u Dr. Kharlukhi u la kubur ba ka jingmih jong kane ka seng kan ktah bha ha ka ilekshon MDC ha rilum Khasi.
“Ha ka ilekshon MLA kaba dang shu dep ruh ka la pynlyngngoh ha kaba baroh ki khlem poi pyrkhat ba ym tang ba ka la jop haduh 4 ngut ki MLA, hynrei ka la pynktah khlieh ruh ha kiba bun kiwei pat ki konstitwensi,” la ong u Dr. Kharlukhi.
“Nalor ba ki la jop 4 ngut ki MLA, ngi la ïohi ruh ba ka jingmih kane ka seng ka la ktah bha kum ha Mylliem, Mawphlang bad Umsning Konstitwensi, ha kaba ka jingïakhun ka la dei beit bad u prah,” la ong shuh u Dr. Kharlukhi.
Ha kaba ïadei pat bad ka rilum Jaiñtia, u Dr. Kharlukhi u la ong ba ka jingïakhun ha ka ilekshon MDC kan dei beit hapdeng ka NPP bad UDP bad kan nym don jingktah eiei na kine ki seng thymmai kum ka Voice of the People Party (VPP) bad ka TMC, ha kaba u la ong ruh ba wat la ka Congress kaba la hiar bha, hynrei kan dang don pat ïa ki vote.
“Wat la kan don ka jingïakhun ha rilum Khasi, hynrei na ka liang jong ka seng ngi la dep ban pynkhreh bad kumno ban ïakhun,” la ong u Dr. Kharlukhi.
