Shillong, Lber 13:
U Symbud Myntri Rangbah ka Jylla, Bah Prestone Tynsong ha ka Lah Sngi U Blei u la pynksan ba ka shnong Mukroh kaba don ha West Jaiñtia Hills ka dang hap hapoh u pud u sam jong ka Meghalaya.
“Ka long kaba shai bad haduh kane ka kynti ka hap hapoh ka jingpeit jong ka Meghalaya. Kumta ka long kaba shai ba ka Mukroh ka don hapoh Meghalaya,” la ong u Bah Tynsong haba kren sha ki lad pathai khubor.
Haba kylli balei u Myntri Rangbah ka Assam, u Himanta Biswa Sarma u la kam ba ka Mukroh ka hap hapoh Assam watla ka jingïakren halor u pud u sam ka dang ïaid, u Bah Tynsong u la ong ba um don jingtip satia balei u Myntri Rangbah ka Assam u la kren kumtei watla mynta ka la poi sha ka bynta ban jam sha ka kylla ba-ar jong ka jingïakren.
“Ha nga hi nga sngew ba um dei ban ong kumne. Ka long ka bym ïahap satia ba un kren kumtei, hynrei ngan ong tang kawei bad da kaba shai ba ka Mukroh hi ka hap hapoh Meghalaya,” u la ong.
U Myntri Rangbah ka Assam, u Himanta Biswa Sarma ha ka Lah Sngi U Blei u la pyntip hapoh ïingdorbar thawaiñ ka Assam ba ka shnong Mukroh ka dang dei kaba hap hapoh u pud u sam jong ka Assam bad hapoh ka jingpeit jong ka West Karbi Anglong District.
Kane ka jingpyntip ka la long haba jubab halor ka jingkylli kaba khlem rah hapoh ka ïingdorbar (unstarred question) na u MLA ka BJP, u Bidyasing Engleng, ha kaba u Sarma u la pyntip sha ka ïingdorbar ba ka shnong Mukroh ka dang dei kaba hap hapoh u pud u sam jong ka Assam bad hapoh ka jingpeit jong ka West Karbi Anglong District.
Kum ban shu pynkynmaw, ka la don ka jingshah siat ïap da ki pulit Assam ïa ki nongshong shnong ka Mukroh ha ka 22 tarik u Naiwieng, 2022, ha kaba 5 ngut ki briew ki la duh noh ïa la ka mynsiem bad uwei u Forest Guard ka Assam.
Halor ki Regional Committee na bynta ban ïaid shakhmat bad ka kylla ba-ar jong ka jingïakren, u Symbud Myntri Rangbah u la ong ba ka Sorkar kan sa khmih bad shim ïa ki sienjam haba ïadei bad kane ka bynta.
“Ngi la kren da kaba shai sha ki nongshong shnong ka Jylla ba ka kylla ba-ar jong ka jingïakren kan sa sdang shen bad ngin sa peit haba ïadei bad kane ka liang,” u la ong.
U Bah Tynsong u la pynsngew ruh ba u Myntri Rangbah ka Jylla, u Conrad K. Sangma lem bad ma u ki la leit sha Delhi ha kine ki khyndiat sngi bad kum ka dak ka jingsngew burom ki la ïakynduh ïa ka President ka Ri, ka Droupadi Murmu lem bad kiwei-kiwei ki nongïalam ba kynthup ïa ka Myntri tnad pla tyngka ka Sorkar Pdeng, ka Nirmala Sitharaman.
U la ïathuh ruh ba ki la ïakren halor ka jinglong-jingman ka pla tyngka jong ka Jylla bad ka Myntri ka la ai ïa ka dak jingkyrmen na ka liang jong ka.
Shuh shuh u la bynrap ba ka Myntri ka la pynsngew ban kyrshan ïa ka Jylla haba ïadei bad ka jinglong-jingman ka pla tyngka.
Haba jubab, u la ong, “Ka jinglong-jingman ka pla tyngka kam long kaba sniew, hynrei kaei kaba nga ong ka long ba kan ai beit ka jingkyrshan ïa ngi.”
