Guwahati, Lber 13:
U Myntri Rangbah ka Assam u Himanta Biswa Sarma ha ka Lah Sngi U Blei ka 13 tarik Lber, 2023 u la pyntip hapoh ka ïingdorbar thawaiñ ka Assam ba ka shnong Mukroh ka dang dei kaba hap hapoh u pud u sam jong ka Assam bad hapoh ka jingpeit jong ka West Karbi Anglong District.
Lah ban pynkynmaw ba kham mynshwa na ka liang u Himanta Biswa Sarma ha kiba bun ki khep u la ong ba ka Mukroh ka dei ka jaka jong ka Meghalaya. Kumjuh ruh ha ka jingïalang ka kynhun Myntri ha ka 23 tarik Naiwieng, 2022 ruh u la ong ba ka Mukroh ka hap hapoh Meghalaya.
Kane ka jingpyntip ka la long haba jubab halor ka jingkylli kaba khlem rah hapoh ka ïingdorbar (unstarred question) na u MLA ka BJP u Bidyasing Engleng, ha kaba u Himanta u la pyntip ïa ka ïingdorbar ba ka shnong Mukroh ka dang dei kaba hap hapoh u pud u sam jong ka Assam bad hapoh ka jingpeit jong ka West Karbi Anglong district.
“Ka la mih ka jingïakynad hapdeng ka kynhun jong ki pulit Assam bad ki nongshalan dieng beaiñ na Meghalaya kaba la jia hapoh u pud u sam ka jylla Assam ha ka 22 tarik Naiwieng 2022,” la ong u Himanta.
Kum ban shu pynkynmaw, ka la don ka jingshah siat ïap da ki pulit Assam ïa ki nongshong shnong ka Mukroh ha ka 22 tarik Naiwieng 2022, ha kaba 5 ngut ki briew ki la duh noh ïa la ka mynsiem bad uwei u Forest Guard ka Assam.
U Himanta u la pyntip ba ka jingjia ha ka shnong Mukroh kam don jingïadei eiei bad ka jingïakajia pud hapdeng ka jylla Assam bad ka Meghalaya. Haba kylli pat halor ka jingkam trai jong ka Meghalaya ïa ka shnong Mukroh, u Himanta u la ong ba ka sorkar Assam ka dang bishar bniah halor ka jingkam trai ka jylla Meghalaya ïa ka shnong Mukroh.
Ha kawei pat ka liang, ka jylla Meghalaya ka la kam trai ïa ka shnong Mukroh bad la sakhi ruh ba ha ki por ba la dep, u Himanta u la ju kdew ba ka shnong Mukroh ka dei ka jaka kaba hap hapoh ka jylla Meghalaya. La lah ban pynshisha ïa ka jingkren jong u Myntri Rangbah ka Assam lyngba ka jingpynpaw jong u ha ka jingïalang ba la dep pynlong da ka kynhun Myntri ka jylla Assam ha ka 23 tarik Naiwieng 2022, ha kaba u la kdew ba ka shnong Mukroh ka hap hapoh Meghalaya.
Shuh shuh u Himanta u la wanrah shakhmat ruh hapoh ka ïingdorbar ïa ka thup kyrteng jong ki 12 ngut kiba la mynsaw ha ka jingjia ha Mukroh.
Haba pynpaw ba ka Sorkar Assam ka ju sngewkhia bha halor ka shongsuk bad jingshngaiñ jong ki nongshong shnong ba sah ha ki thaiñ khappud, u Myntri Rangbah u la ong ba haduh hynriew tylli ki Border Out Posts (BOP) ki la treikam ha West Karbi Anglong district ha lynter jong u pud u sam.
“Ki don bun ki shnong ha West Karbi Anglong district kiba don markhap bad u pud u sam jong ka Meghalaya,” la ong u Himanta bad u la kdew ruh ïa ki kyrteng jong ki katto katne ki shnong kum ka Sabuda, Umlapher, Ulukunchi, Khanduli, Mokoiram, Arting, Umkhermi, No 2 Umrah, Umeli, Umswai bad Impanai, kiba don ha khappud bad ka Meghalaya.
