Patna, Lber:
U Myntri Rangbah jong ka Bihar u Nitish Kumar u la sngewkmen halor ka jingshah khynra ki bahaïing jong u Lalu Yadav, la ïathuh u heh nongïalam jong ka seng Bharatiya Janata Party u Sushil Modi, ha kaba u la bynrap shuh shuh da kaba ong ba u Myntri Rangbah jong ka Bihar u la kwah ba u Tejashwi Yadav ruh un leit sha patok.
Kane ka jingkren jong u ka la long hadien ba ka kynhun Enforcement Directorate (ED) ka la leit ban khynra ha ka ïingsah jong u Symbud Myntri Rangbah u Tejashwi Yadav ha Delhi bad ha kiba bun kiwei pat ki jaka sah bad jaka treikam jong ki nongïarap jong u Lalu Yadav.
Ki kynhun tohkit jong ka sorkar kmie, kiba kynthup ïa ka ED bad CBI, ki la pynlong ïa ka jingtohkit kaba la pynshisha ïa ka jingdonkti jong u Lalu Yadav bad ki dkhot ka longïing jong u ha kaba ïadei bad ka kam bamsap kaba la mih na ka jingïapeiñ jaka puta bad ka kam ha ka tnat Railways.
U Sushil Modi u la pynshisha da kaba ong ba ki la don ki jingleh donbor halor u Nitish Kumar na ka seng Rashtriya Janata Dal (RJD), ban pynlong Myntri Rangbah ïa u Tejashwi Yadav bad kane kan sa kut noh.
“U Myntri Rangbah u Nitish Kumar u la sngewkmen halor ka jingdon jong ka jingleit khynra ïa ki dkhot ka longïing jong u Lalu Yadav naba ka jingleh donbor kaba la long na ka seng RJD ban pynlong Myntri Rangbah ïa u Tejashwi Yadav ka la kut noh. U la kwah ba u Tejashwi Yadav un leit sha patok bad namar kane u la ong ba ka kynhun CBI ka la dei ban pynsted ha kaba ïadei bad ka jingpynlong ïa ka jingtohkit,” la ong u Sushil Modi kumba la ïathuh da ki lad phah khubor.
Ka kynhun Enforcement Directorate (ED) ha ka sngi Saitjaiñ jong ka taïew ba la lah ka la ïoh ban kurup kumba T. 1 klur ka pisa ka bym don jingkheiñ bad ka jingpyntreikam ka dang ïaid shakhmat na ka bynta ban tohkit halor ka kam bamsap kaba la kot sha ka T. 600 klur hadien ba la dep ban pynlong ïa ka jingkhynra pyrshah ïa u Lalu Prasad bad ki bahaïing jong u ha kaba ïadei bad ka kam bamsap.
U Tejashwi Yadav u la shah khot na ka bynta ka jingshah tohkit ha ka sngi Saitjaiñ da ka kynhun Central Bureau of Investigation (CBI) ha kaba ïadei bad ka jingbym leit mih jong u bad la pan da kawei pat ka tarik na ka bynta ban shah tohkit namar ka jingbym lait na ki daw shimet ki bym lah ban kiar.
Ka kynhun tohkit dang shen ka la tohkit bniah ïa u Lalu Prasad bad ïa ka kurim jong u ka Rabri Devi, kiba long ki Myntri Rangbah barim jong ka Bihar ha kaba ïadei bad ka jingjia.
Ka la pynshisha ba ki la don ki briew kiba la ïoh kam ha ka tnat Railway da kaba ïapeiñ kum ka jingai sngewbha bad ka jingthied ïa ki jaka puta sha ka longïing jong u Yadav bad sha ki nongïarap jong u ha ka por ba u Prasad u dang bat ïa ka kam kum u Myntri ba dei khmih ïa ka tnat Railway ha ka sorkar UPA naduh u snem 2004 haduh 2009.
