Mawkyrwat, Lber 13:
Uwei u samla pule uba dang 24 snem ka rta, u la duh ei noh ïa la ka jingim hadien ba u la ngam jyllop ha ka wah Od-Ringai kaba don ha ka shnong Mawten ha South West Khasi Hills District.
Katkum ki tyllong khubor ba la ïoh lum la ïathuh ba kane ka jingjia ka la jia ha ka 13 tarik mynta u bnai bad une u samla uba la khlad noh u dei uba la tip kyrteng kum u Abhishek Roy na ka jylla Jharkhand bad uba dang pule ïa ka Chemical Engineering IIM ha Guwahati.
Shuh shuh ka tyllong khubor ka la ïathuh ba ha ka step jong ka sngi Nyngkong kata ha ka por kumba 10 baje eiei, une u samla ryngkat bad san ngut ki paralok kiba la leit kai sha kane ka jaka, ki la jngi kai ha kane ka wah. Hynrei, kyndit-kynsan ha ka jingbakla une u samla u la ngam shapoh ka um kaba jylliew kumba 20 phut eiei bad ngam jyllop syndon.
Ha kaba ïadei bad kane ka jingjia, ki pulit na ka Fire & Emergency Service Mawkyrwat mar synïoh jingtip wut-wut ki la leit sha kane ka jaka bad dei haduh ka por kumba 4 baje janmiet ba ki la ïoh ban sei noh ïa ka met jong une u samla.
Hadien kata ïa ka met jong une u samla pule la pynkit noh sha CHC Mawkyrwat.
