Shillong, Lber 13:
U Vice-President ka All India Trinamool Congress (AITC), Bah George B. Lyngdoh u la pynrem jur halor ka jingkam ka Sorkar Assam ba ka shnong Mukroh ka hap hapoh ka Jylla Assam.
“Ngim lah pdiang satia ïa kane ka jingkam ka Sorkar Assam. Ngi pynrem jur ïa kane ka jingpyrshang ban pynjulor ïa ki jingshisha haba ïadei bad ka mynbarim bad ha ka liang ka saiñ pyrthei halor ka jaka kaba dei jong ka Meghalaya,” la ong u Bah Lyngdoh ha ka kyrwoh.
U la ong ruh ba ka seng ka kyntait ïa katei ka jingkam bad kan ym shah satia ba ka Assam kan wan kam ïa ka khyndew ka shyiap jong ka Jylla.
“Ngi maham ïa ka Sorkar Assam ba kiba kum kine ki jingkam ba khlem nongrim kin nang pynbun pynban ïa ki jingïapher jingmut bad pynthut ïa ka shong suk shong shngaiñ hapdeng ki nongshong shnong ka Assam bad Meghalaya,” u la ong.
Na ka liang utei u nongïalam u la kyrpad ruh ïa ka Sorkar BJP hapoh ka Jylla ban trei na bynta ka bha ka miat jong ki paidbah ka Jylla bad ym ban shah jem ha ki kynrad nongïalam jong ki kiba na Guwahati.
