Kyiv, Lber:
Ki tnat pahara jong ka SBU jong ka Ukraine, ha ka Sngi U Blei ki la pynithuh kyrteng ia uwei u shipai jong katei ka ri, uba la shah rah bad shah siat dusmon ha ki shipai ka Russia. Ia kane ka jingjia la iohi hapoh kawei ka video kaba la saphriang paidbah bha ha Social Media.
Ki tnat tohkit jong ka SBU, ki la pynithuh kyrteng ia utei u shipai kum u Oleksandr Igorovich Matsievsky, uba la don 42 snem ka rta bad uba long ruh u nongsiat ‘Sniper’ jong ka tnat 163 Battalion jong ka tnat shipai na ka thaiñ Chernihiv, kaba don sha ka phang Northeast jong ka Ukraine.
Ha ka Sngi U Blei, u President ka Ukraine, u Volodymyr Zelensky u la ïaroh ia ka jingshlur bad jinglen lade jong u Matsievsky bad kumta ruh u la pynbna ia ka jingpynkup burom ha ka kyrteng jong u, kum u shipai uba shlur jong ka Ukraine. Namarkata ruh u Zelensky, u la ong ba u Matsievsky un long u shipai bad u briew u ban pynsah kynmaw baroh shyrta.
Katkum ka jingiohi ha ki video ba la ioh ban ring dur bad pyllait da ki shipai ka Russia, la iohi ia utei u shipai uba la shah siat da ki tiar siat ‘Automatic’ hadien ka jingpyrta jong u ia ka kyntien ‘Glory to Ukraine’ lane ‘Ka nam bad burom ka long ia ka Ukraine’.
Katkum ki kaiphod ba la iohlum, la ioh jingtip ba u Matsievsky u la shah kem noh ha ki shipai ka Russia, ha ryngkat bad 4 ngut kiwei pat ki shipai jong ka Russia bad la set bad pynshitom beiñ ruh ia ki hapoh ka thaiñ Donetsk. Bad ha kine ki khyndiat sngi ba la leit, ka kmie jong u, ka la pynpaw paidbah ia ka dur jong u hapoh ka prokram pathai khubor ha TV.
Kumta, la ong ba u Matsievsky, u long shisha u shipai nongiada jong ka ri Ukraine, naba wat ha thmier ka jingiap, um salia ban pyni ba u long u nong Ukraine bad ban pynpaw ia ka nam jong ka Ukraine sha ka pyrthei baroh kawei.
Ha kajuh ka por ruh, ki heh ka Ukraine ki la iathuh ba ki tnat wad bniah bad ki tnat iada jong ka Ukraine, ki dang trei shitom ban wad jingtip shaphang kitei ki shipai kiba don kti ban leh ia katei ka kam dusmon bad ban pynpaw pyrshah ruh ia ka jingshun jaitbynriew.
Kumba la iohi ba naduh ki por ba ka Russia ka dang sdang phah leit hiar thma ia ki shipai jong ka sha Ukraine, ki la don shibun ki shipai jong ka Russia bad kumjuh ruh ki paidbah nongshong shnong jong ka Russia, kiba pyrshah jur ia ka jingleh jong ka Sorkar Russia bad kiba la dawa ruh ban sangeh noh ia ka jingleit hiar thma jongka pyrshah ia ka Ukraine.
Hynrei ha kane ka por pat la iohi pynban ba kitei ki shipai jong ka Russia, ym tang ba ki la iakhun bad thombor ia ki shipai ka Ukraine, hynrei ki da kem bad set patok ia kitei ki shipai jong ka Ukraine ban pynshitom bad ban pyni bor ruh ia ka Ukraine, da ka jingthmu ban pynhiar dor ia ka kyrteng jong ka Ukraine.
