Lucknow, Lber:
U Akhilesh Yadav u la kynthoh jur ïa ka sorkar BJP ha Uttar Pradesh ha kaba la buh jingkylli ba hato ka la pyndonkam da ka kali puh shilum na ka bynta ban leh ei ei pyrshah ïa u ophisar.
Ka la don ka hukum ba la dei ban don da ka jingtohkit kaba bniah hadien ba u President jong ka seng Samajwadi Party u Akhilesh Yadav u la phah lyngba ka Twitter ïa ka Video jong u IPS Officer uba la dawa pisa na uwei u heh spah ha ka sngi U Blei bad kynthoh jur ïa ka sorkar jong u Yogi ha Uttar Pradesh ha kaba la kylli ba la pyndonkam ïa ka kali puh shilum na ka bynta une u ophisaw ne em.
U Anirudh Singh, uba long u IPS Officer ha ryngkat ki pulit jong ka UP, kumba la ïoh jingtip la ong ba u la shah thungkam ha Varanasi. La ïohi ba lyngba ka Video Call u la dawa pisa ha kaba u la phah ban pynbiang da kumba T. 20 lak. Kumba la ïathuh la ong ba kane ka Video ka la paw ba u Singh u la leh ïa kane ka kam ha ka por ba u la shah thungkam ha Meerut distrik.
U Police Commissioner u la shah bthah ba u la dei ban phah ïa ka kaiphot halor kane ka jingjia, la ïathuh ka tyllong khubor. “Hadien kane ka Video kaba la pynpaw ïa ka jingdawa pisa jong u IPS ha UP, hato ki kali puh shilum kin phai sha u ne ka sorkar BJP kan ïaid lait ha kaba ïadei bad kane ka jingjia ne ba kan pynpaw shuh shuh ïa ki kyrteng ha ka thup jong kito ki IPS kiba dang phet rieh? Ki briew jong ka UP ki la ïohi bad sakhi ïa ka jingbym leh ei ei jong ka seng BJP pyrshah ïa ki kam sniew,” la ong u Akhilesh Yadav ha ka khubor ba la phah lyngba ka Twitter ha ryngkat ka Video Clip kaba don 10 Second.
Kum ka jingai jubab halor katei ka jingphah khubor jong u Yadav, ki pulit jong Meerut ki la ong, “Kane ka Video ka dei kaba la don ar snem mynta bad kam shym don bynta ei ei bad ka Meerut. Ïa ka jingtohkit ha kaba ïadei bad kane ka jingjia la dep ban leh.”
Hadien kane, u Director General jong ki pulit ka UP ki la phah ïa ka jingthoh kaba la ong ba ki pulit ki la pynlong ïa ka jingtohkit halor kane ka Video, kaba la ar snem mynta.
“Ka Video jong u Shri Anirudh Singh, IPS Officer uba la shah thung kam kum u SP Rural ha Meerut distrik, ka la saphriang kylleng ha kaba la ïohi ba u la ïakren bad uwei u briew lyngba ka Video Call. Ha kaba ïadei bad kane ka Video, ki la don ki jingkynnoh ba ka la don ka kam bamsap kaba long pyrshah ïa u Singh,” la ong ka jingthoh ba la phah da u DGP.
“Kane ka jingjia ka dei kaba la jia ha ki ar snem ba la leit, hynrei na ka jingïohi ba la dei ban shimkhia halor ka jingjia, ka jaka treikam jong ki pulit ka la pynlong ïa ka jingtohkit halor jong ka na ka jingai hukum u Commissioner Varanasi, ïa uba mynta u la thungkam ïa u ophisar bad dawa ïa ka kaiphot ka ban long hapoh ki lai sngi,” ka la ong.
Ha kaba ïadei bad kane ka jingjia, ki pulit ki la pynlong sa kawei pat ka jingtohkit kaba long pyrshah ïa ka kurim jong u Singh, kaba long hi ka IPS Officer, halor ka jingshah kynnoh lyngba ka Twitter kaba long pyrshah ïa ka naba kam shym la siew ïa ka bai wai sha ki trai jaka, la ïathuh ka tyllong khubor.
Ka Aarti Singh, kaba la shah thung kam kum ka DCP ha Varuna Zone Commissionerate ha Varanasi, ka la shah kynnoh ba kam shym la siew ïa ka bai wai jong ka Flat ba ka sah, la ïathuh ka jaka treikam jong u DGP.
“Ka Aarti Singh ka dei ka kurim jong u Anirudh Singh. Ngi la ïoh jingtip ba ka Aarti Singh ka la siew ïa ka baiwai bad ba kam don shuh ka pisa kaba sah ba ka la hap ban siew, hynrei ka jaka treikam jong ki pulit ka la bthah ïa u Commissioner jong ka Varanasi ba la dei ban pynlong ïa ka jingtohkit halor kane ka jingjia bad ban ai ïa ka kaiphot hapoh ki lai sngi,” ka la ong.
