Imphal, Lber:
Ki bor pulit jong ka jylla Manipur ha ki khyndiat sngi kiba la dep ki la leit ban kem ïa 4 ngut ki ophisar jong ka sokar jylla kiba la shongthait na ka kam na ka daw jong ka jingdonkti – ha ki kam bam sap kiba kynthup ïa ki kam shna tuh ïa ki pata khyndew bad kumjuh ruh ka jingpyndonkam bakla ïa ka pisa sorkar.
Halor katei ka jingjia, kat kum ka jingïathuh jong u heh pulit ka Imphal East district police station u la pyntip ba ïa u retired Sub Divisional Collector (SDC) G Chinglensana Kabui, (51 snem ka rta), retired Circle Mandal, L Sanatomba (48 snem ka rta) bad ïa u retired Circle Mandal L Biswanath (48 snem ka rta) la kem ïa ki na ka daw jong ka jingdonkti ha ki kam beaiñ ban shna tuh ïa ki pata khyndew ha ka por ba ki dang trei kum ki shakri sorkar.
U heh pulit u la ïathuh shuh shuh ba sa ha kawei ka moktduma kaba ïadei bad ka jingpyndonkam bakla ïa 2 tylli ki ‘gift deeds’, u retired sub-register jong ka Porompat Revenue circle u ba la tip kyrteng kum u S Ibomcha (52 snem ka rta) bad kawei ka longkmie kaba la tip kyrteng kum ka Khondrakpam Damayenta (59 snem ka rta) ki la shah kem na ka daw jong ka jingdonkti jong ki ban soi tuh ïa kitei ki 2 tylli ki ‘gift deeds’ ha u snem 2022.
U heh pulit u la ïathuh shuh shuh ba ïa baroh 4 ngut kitei ki nongtrei sorkar kiba la shongthait bad ïa ka longkmie la ïoh ban kem ha ka Sngi Saitjaiñ kaba la dep na ki ïing sah jong ki bad la leit ruh ban rah tian bishar hakhmat u chief judicial magistrate jong ka Imphal East district.
Kat kum ki jingïoh lum khubor la ïathuh ba ki bor pulit jong ka jylla ki la leit ban kem ïa kitei ki 5 ngut hadien ka jingïoh ïa ka jingujor na u Additional Deputy Commissioner jong ka Imphal East district.
Kat kum ki jingïoh lum khubor la ïathuh shuh shuh ba kitei kiba la shah kem ha katei ka sngi ki la shah pynngat ruh hapoh ka section 420 (cheating), 467 (forgery of valuable security), 468 (forgery for purpose of cheating), 471 (using as genuine a forged), bad 120B (criminal conspiracy) jong ka IPC.
