USA, Lber:
Ka Aryna Sabalenka na ka ri Belarus bad kaba long ruh ka lahduh ha ka Australian Open jong ka jingialehkai Tennis mynta u snem, ka lah kynjoh sha ka kylla iakhun ba saw ha ka lympung Indian Wells hadien ba jop da ka w/o (walkover) namar ka jingweng noh ka nong-ialehkai na Ukraine ka Lesia Tsurenko kaba dei ban ia aireng ha katei ka lympung.
Kumta na ka liang jong ki nongpyniaid ki iathuh ba ka jingweng noh jong ka Tsurenko na ki jingiakhun ba dangsah ka dei namar ki daw shimet. Kumta katei ka nongialekai kam shym la pynpaw satia ia ka jingbatai kaba bniah halor katei ka bynta bad kam shym la don satia kano kano ka dak ka shin ka ban paw mynta ba ka jingweng noh jong ka na ka jingiakhun ka long tang na ka daw jong ka jinghiar thma ka Russia ia ka ri jong ka naduh u snem ba la dep. Namarkata, ka la pynlong ruh ia ki nongialehkai ka ri Russia bad Belarus ban jingshah khang ialehkai ha kino ma ki lympung iakhun ba kin mih ia aireng na ka lama ka ri jong ki.
Kumta ruh ka Sabalenka kaba lah rah ha ka sien kaba nyngkongeh ia ka nam jop ha ka lympung iakhun Grand Slam ha une u snem ba mynta ha Melbourne, ka long ka shibynta jong ka jingseisoh da 13-0 ha kaba sdang shaduh u snem uba ka lah pynkut nh da ka jingiakhun quarter-finals ha Dubai.
Hadien katei ka w/o ba ka lah ioh mynta ha ka lympung, ka Aryna kan iakynduh sa bad ka lahduh barim ka French Open ka Barbora Krejcikova; kaba la lah ban pynliem noh ia ka nongiakhun na China a Wang Xinyu da 6-2, 6-7 (1/7), 6-2.
Kumta ruh, ka Krejcikova ka lah seisoh ha ka jingiaid lynti jong ka ha katei ka lympung da kaba pynliem noh ia ki lai ngut ki nongialehkai ba paw shakhmat ha ka pyrthei ha ka jingiaid lynti jong ka ban khur ia ka khusnam ha Dubai ha u bnai ba lah dep da kaba kiew mynta da khat-saw jaka sha ka kyrdan ba 16 ha ka thup kyrdan ba thymmai ka WTA.
