Shillong, Lber 13:
Ka jingbym ïawan lang ka Congress bad ka All India Trinamool Congress (AITC) ban thaw ïa ka kynhun ha Ïingdorbar Thawaiñ ka lah ban buh jingeh ïa u Lamphang ban ai rai ïano ban thung kum u nongïalam ka Liang Pyrshah, namar ka Congress ne TMC ki don MLA tang mar san ngut.
Haba kylli la ka Congress kan ïatreilang bad ka TMC ban thaw ïa kynhun Liang Pyrshah, u nongïalam ka Congress Legislature Party (CLP), u Bah Ronnie V Lyngdoh u la ong ba ka Congress kam lah ban shu shim rai hi ban ïatreilang bad ka TMC namarba kine baroh ar tylli ki seng ki khlem don kano ka jingsngewthuh jingmut ban ïatreilang wat ha kiwei ki Jylla jong ka ri.
“Ngi hap ban ïoh ka jingbthah na ka AICC lada donkam ban don kum kata ka kynhun ban ïatreilang kum ka Liang Pyrshah. Hynrei haduh mynta, ym pat don jingsngewthuh ban thaw lang kawei ka kynhun Liang Pyrshah hapdeng ka Congress bad ka TMC,” la pynshai une u MLA ka Congress na Mylliem.
U Bah Ronnie u la ïathuh ba na ka liang ka CLP ka la phah da ka shithi sha u Lamphang ha kaba la banjur ba dei ban don u nongïalam ka Liang Pyrshah ha ïingdorbar Thawaiñ.
“Ngi la kyntu ïa u Lamphang ha ka shithi ba ngi phah halor ka jingdonkam ban don u nongïalam ka Liang Pyrshah, tangba ka shong ha ka rai jong u Lamphang kumno ban leh haba ïadei bad kane ka bynta,” la ong u Bah Ronnie.
Kum ban pynkynmaw, kano kano ka seng saiñ pyrthei ha Meghalaya kaba dei ban ïoh kam ïa ka kyrdan nongïalam ka Liang Pyrshah ha ïingdorbar, ka donkam ban don 10 ngut ki MLA ha ka ïingdorbar (one-sixth na ka jingdon 60 ngut ki dkhot).
Hynrei ka Congress bad ka TMC ki don MLA tang mar san ngut, bad kim lah satia ban kam ïa katei ka kyrdan lada u Lamphang u ïaid katkum ki kyndon ba la don lypa.
Dei ha ka por jong u AT Mondal, kum u Lamphang barim ka Ïingdorbar Thawaiñ, u la ai ka jingithuh ïa u Dr. Donkupar Roy (ba la khlad noh) kum u nongïalam ka Liang Pyrshah ha u snem 2013, wat lada ka United Democratic Party (UDP) ha kato ka por ka don tang 8 ngut ki MLA.
U Mondal u la ai ïa ka rai ban ithuh ïa u Dr. Donkupar Roy kum u nongïalam ka Liang Pyrshah ha kato ka por da kaba pynshong nongrim bad bud ïa ka rai jong ki Lamphang kiba la leit kynthup ïa ka rai jong u Lamphang barim, Bah E.K Mawlong (ba la khlad noh), ha kaba la pdiang ïa ka seng kaba don tang 6 ngut ki MLA (one-tenth na ka jingdon ki 60 dkhot) ha ïingdorbar.
Kumta ha u snem 2013, ïa u Dr. Donkupar Roy la ithuh kum u nongïalam ka Liang Pyrshah bad la ithuh ruh ïa ka UDP kum ka seng Liang Pyrshah kaba hakhmat eh na baroh kiwei pat kiba don sha ka Liang Pyrshah. Ha u snem 2013, nalor ka UDP, ka NPP, bad GNC ruh ki donlang sha ka Liang Pyrshah.
U Mondal u la ai ka jingithuh ruh ïa ka kynhun synrop jong ki seng Liang Pyrshah kaba kyrteng ka Meghalaya People’s Forum (MPF). Ka MPF kum ka kynhun, ka don 12 ngut ki MLA ha kato ka por kaba kynthup ïa ka UDP kaba don 8 ngut ki MLA, ka National People’s Party (NPP) kaba don tang 2 ngut ki MLA lem bad ka Garo National Council (GNC) kaba don uwei u MLA, bad u Saleng A Sangma kum u MLA shimet.
U Lamphang ha kato ka por, u la ithuh ruh ïa ka MPF kum ka kynhun Liang Pyrshah ha kaba la thung ruh ïa u Opposition Chief Whip kham hadien.
