Shillong, Lber 13:
Ka Congress kaba shong sha ka Liang Pyrshah ha Ïingdorbar Thawaiñ ka la pynkhreh ban rah katto katne ki mat kiba ktah ïa ka Jylla naduh ki projek kiba sahteng, ka jingeh ba mad ki samla bad ki lad ki lynti ha ka ïoh kam ïoh jam bad kiwei kiwei.
Na ka liang u nongïalam ka Congress Legislature Party (CLP), uba dei u MLA ka Congress na Mylliem konstitwensi, u Bah Ronnie V Lyngdoh u la ïathuh ba na ka liang ka seng, ka la pynkhreh ban rah ha ïingdorbar ha kane ka Dorbar Mang Tyngka katto katne ki mat kiba donkam ban pynsngew sha ka Sorkar bad ban kyntu ïa ka Sorkar ba kan shim ki lad ki lynti na bynta jong ki samla ha ka liang ka ïoh kam ïoh jam bad seng kam seng jam.
Katkum ka jingïathuh u Bah Ronnie, ki mat kiba ki MLA ka Congress kin sa ïashimbynta lang ban ïatai ki kynthup ïa ki projek kiba kongsan kiba sahteng kum ka jingshna ïa ka surok Four Lane na Umshyrpi, ka jingtreikam ka Common University Entrance Test (CUET), ka jingpyntrei ïa ki projek sam umbam umdih nalor kiwei kiwei ki mat.
U Bah Ronnie u la ïathuh ba ka don ruh ka projek umbam umdih ha thaiñ Upper Shillong kaba dang sahteng lyngba ka Jal Jeevan Mission (JJM) bad ka long kaba donkam eh ïa ka Sorkar ba kan pynsted ïa ka rukom pyntrei na ka bynta ka jingmyntoi ki paidbah.
Ka Congress kaba ju long ka kynhun kaba khlaiñ bha ha ïingdorbar ha ki snem kiba la leit, mynta ka don tang 5 ngut ki MLA.
