Imphal, Lber:
U Myntri Rangbah jong ka jylla Manipur, u N Biren Singh ha ki khyndiat sngi kiba la leit noh u la pyntip ba ka National Investigation Agency (NIA) kan sa shimti ïa ka mokotduma ban tohkit halor ka jingshah pynïap u khun jong uwei u Myntri barim jong ka sorkar jylla ha ki 2 ngut ki nongïalam jong ka seng NSCN-IM bad kawei ka nong Manipur.
Halor katei ka jingjia, la ïathuh ba kat kum ki jingïoh lum khubor la ong ba uwei na kitei ki nongïalam jong ka NSCN-IM u la shah kem ha ryngkat ka nong Manipur (40 snem ka rta); katba uwei pat u nongïalam ka NSCN-IM u dang don hapdeng ka jingphet rieh.
Ïa katei ka khubor, u Myntri Rangbah jong ka jylla u la pyntip ha ka jingïalang bad ki nongïalam ka Joint Action Committee kaba la thaw ban wad jingtip halor ka jingshah pynïap jong u Akoijam Nonganba (40 snem ka rta). La pynlong ïa ka jingïalang ha ka shlem treikam jong u Myntri Rangbah ha ka miet jong ka sngi Saitjaiñ ba la dep.
Ha katei ka jingïalang, na ka liang u Myntri Rangbah u la pyntip ba ki bor pulit ki dang pynbteng ïa ki kam tohkit khnang ban ïoh kem sa ïa uwei u nongïalam jong ka NSCN-IM u ba dang don hapdeng ka jingphet rieh.
Kat kum ki jingïoh lum khubor la ïathuh ba ïa ka metïap jong u Akoijam Nonganba (40) u ba dei u khun jong u Myntri barim ka sorakar jylla (Late. AK Pilot Langam na Kwakeithel, Imphal West) la lap na ka shnong Changoubung ha ka 12 tarik u bnai Rymphang.
Kat kum ka jingïathuh jong ki bor pulit, la pyntip ba u Akoijan ha katei ka sngi u la mih na la ka jong ka ïing ha ryngkat ka samla jong u kaba la tip kyrteng kum ka Thokchom Sonia (40 snem ka rta). Hadien ka jingshah pynïap jong u Akoijan, na ka liang ki bor pulit jong ka jylla ki la leit ruh ban kem ïa ka Sonia ha ka 17 tarik u Rymphang, 2023.
Na ka liang u Myntri Rangbah ka jylla u la ïathuh ba dei ki dkhot nongïalam jong ka JAC kiba la kyrpad ba dei ban aiti sha ka NIA ba kan tohkit halor katei ka jingshah pynïap u Akoijan.
