Nongstoiñ, Lber 14:
Uwei u briew ïa uba la tip kyrteng kum u Augustine Momin ba ju khot sin ruh kum u Rajesh G Momin, u la shah rai pynrem ha ka ïingbishar u Special Judge (POCSO) West Khasi Hills ban shah set patok ha ryngkat bad ka kuna.
Katkum ka kyrwoh khubor, ka ïingbishar ka la pynmih ïa kane ka hukum ha ka 7 tarik u Lber 2023 hadien ba ka la bishar ïa ka case jong ka thanad Shallang bad lap ba u dei uba donkti ban leh be-ijot ïa ka khynnah ba dang hapoh 18 snem.
Kumta ka ïingbishar ka la rai ruh ban pynsaja katkum ka kyndon 6 ban set patok ïa utei u briew haduh 25 snem ha ryngkat ka kuna kaba T.30,000. Lada jia ba um lah siew ïa kane ka kuna un hap ban bteng shong patok biang sa 6 bnai.
Ka hukum ba la pynmih ka ong ruh ba sa kawei pat ka kyndon kaba utei u briew u la shah pynngat ka dei ka kyndon 506 Part II IPC, ha kaba un hap ban shah set patok haduh 5 snem ryngkat ka kuna kaba T.5,000 un hap ban siew bad lada um siew un hap ban bteng shong patok biang sa 1 bnai.
La ong ruh ba ïa utei u briew, ka ïingbishar ka la lap ba u dei uba donkti ban leh be-ijot ïa ka khynnah kaba dang hapoh ka 18 snem kaba la jia ruh ha kawei na ki shnong jong ka West Khasi Hills ha ka 31 tarik u Naitung jong u snem 2020. Hadien kata la pynrung ïa ka case hapoh ka Shallang Police Station C/No.9 (07)/2020 Under Section 5(m)/6 of POCSO Act.
Ka khubor ka ong ruh da ka jingtrei shitom ka tnat pulit, ïa utei u briew la lah ban kem noh ha ki khyndiat por jong katei ka jingjia. Ha ka jingïaid lynti jong ka jingtohkit bniah la lap ba u dei uba la donkti ban leh ïa katei ka kam runar ha kaba na ka liang jong ka ïingbishar ka la lah ban ai syndon ïa ka jingbishar kaba hok ïa ka lanot.
