Doha, Lber:
Ka Shreyasi Singh bad u Prithviraj Tondaiman ki la lah ban siat haduh 142 bad kiba la duh noh ruh ia ka lad ka lynti na ka bynta ka jingiakhun sha ka rynsan iaknieh takma hadien ba ki duna tang da 1 dor-thong (point) ha ka rynsan Mixed Trap ba ki lah shimbynta ha ka lympung ialehkai ba mynta ha Qatar ka Shotgun World Cup.
Kumta hadien katei ka jingjia, ka ri baroh kawei ka lah hap ban shu hun noh da ka takma Rnong ba lah pynioh da u Prithviraj ha ka jingiakob siat ki shynrang ha ka Trap bad ka long ruh ka takma balai na ka kyrdan iakhun paramarwei kaba u tei u nongialehkai u la lah ban khur ha ka World Cup.
Ka khubor ka iathuh ruh ba ka India ka long kaba khyndai napdeng ki 10 tylli ki ri ban lah ha ka ban pynneh ialade ha ka kyrdan ha ka miej khein takma; ha kaba ka USA ka bat ia ka kyrdan ba hakhliehduheh da ka jinglah ban khur ia ki 3 tylli ka takma Ksiar, 2 ka Rupa bad 1 ka Rnong. Katba ka Italy, Australia bad Turkey ruh ki long ki ri kiba la lah ban khur takma Ksiar na ka lympung.
Ki jingmih na katei ka lympung:
Mixed Trap Team: 1. USA (Alicia Gough, William Hinton) 6 (144); 2. Kuwait (Sarah Alhawal, Talal Alrashidi) 0 (145); 3. Poland (Sandra Bernal, Piotr Kowalczyk) 6 (143); 4. Turkey (Rumeysa Kaya, Tolga Tuncer) 4 (143); 6. India (Shreyasi Singh, Prithviraj Tondaiman) 142.
