Shillong, Lber 14:
Ka lympung ïalehkai First Division Shillong Cricket League 2022-23 ba la pynïaid da ka Shillong Cricket Association ka la nang jam shaphrang ha kaba ka Nongthymmai S.C.C ka la khur ïa ka jingjop hadien ba lah pynliem noh ïa ka Matri Sangha S.C da 9 run ha ka Sngi Ba-ar ha madan Polo.
Ha kane ka jingïakhun ka Matri Sangha ka la jop ïa ka jingkynting pisa, hynrei ka la ailad shwa ïa ka Nongthymmai ba kan tied nyngkong bad ka la kamai 141 run na bynta ban shah pynkhyllem 10 wiket ha ki 32.3 over. U Shyam S. Pachar u la ïoh ban khyrwit ïa ka shiteng spah run da kaba ïoh 50 run na ki 66 bol bad u Himlal Chettri u la tied 20 run na ki 29 bol. Katba u Ravi Sunar u la khur 3 wiket bad ïa ki 2 wiket la khur da u Kishor Bhowmik na ka bynta ka Matri Sangha.
Haba wan beh ïa ka thong, ki nongtied ka Matri Sangha S.C ki la shah pynkhyllem lut baroh bad ban kamai tang 132 run ha ki 32.2 over. U Kishor Bhowmik u la tied 24 run na ki 28 bol bad u Soumyadeep Dey u la tied 24 run na ki 40 bol. Katba u Ranjeet K. Rai bad u Ram Najiar ki la khur mar 3 wiket na ka bynta ka Nongthymmai. Ïa ka nam ‘Man of the Match’ la khur da u Shyam S. Pachar uba ïoh 50 run.
