Shillong, Lber 14:
Ka jingïalehkai kaba nyngkong jong ka U-15 Inter District Cricket Tournament 2023 ba la pynïaid da ka Meghalaya Cricket Association ka la kut da ka jingïakhaid hapdeng ka Ri-Bhoi bad ka Shillong Cricket Association-A ha ka sngi Ba-ar ha Umbuda, Ri-Bhoi.
Ha ka sngi kaba nyngkong kaba la long ha ka Lah Sngi U Blei, ka Ri-Bhoi ka la shah pynkhyllem baroh ki nongtied bad kamai 107 run ha ka inning kaba nyngkong. Hynrei ka SCA-A kaba la wan beh ïa ka thong ka la kamai 66 run. Hadien kata ka Ri-Bhoi ka la kamai 135 run bad shah pynkhyllem baroh ki nongtied ha kaba ka SCA-A ka la donkam 177 run ban khur ïa ka jingjop hynne ka sngi.
Ha kane ka jingïakhun ka SCA-A ha kaba nyngkong ka la sdang da kaba kamai 49-run lyngba ka jingïalehkai lang u Samelawan S. Nongkseh (13) bad u Rudra S. Rathor hashwa ban hap ka wiket kaba nyngkong. Hadien u Rathor u la lah ban ïalehkai lang bad u Krishiv Chaudhary na ka bynta ban kynjoh sha ki 58 run na ka bynta ka wiket kaba ar.
Hynrei hadien u Rathor u la shah pynkhyllem noh hadien ba u la shah pynhap wiket bad kamai 47. U Chaudhary u la ïai bteng ban ïakhun tyngeh hynrei ula duh noh ïa u paralok nongtied bad u la kynjoh (78 not out) bad ban pynlong ïa kane ka kynhun ban shah pynkhyllem badoh ki nongtied na ka bynta ban kamai 176 run ha ki 48.3 over.
U Sanjay Sawkuta u la lah ban ïalehkai bha da kaba khur 6 wiket, katba u Gaurav Narleng u la khur 2 wiwket. U Sawkuta uba la lah ban khyrwit ïa ka shiteng spah run u la long u nongïalehkai ba kynsai ha kane ka jingïakhun.
