C.B Iawphniaw
Ngi kum ki briew ka Bri u Hynñiewtrep Hynñiewskum ngi dei ban da husiar na ki kam sniew kam smeh kiba wan ber bih kylleng hapoh ka Ri Khasi ba ieid jongngi na ki bor ba nabar. Lada ngi lah ban iada ia ka jingsniew kata ngi la lah ban iada ia ka Jaidbynriew. Kumno kein ngin iada ia ka jaitbynriew haba ngim lah ban pynduh ia ki kam sniew ha ka imlang ka sahlang. Ka jaitbynriew kaba la satah tang ki kam sniew ka long thik kum kta ka Sodom bad Gommurah ha ki por hyndai hynthait.
Kumta ngi dei ban kiar katlah katiai na kino kino ki kam sniew kiba lah ban pynthohbria ia ka Ri bad ka jaitbynriew. Ka dei namarkata ba ngin ialeh shi-tom ban pynduh jait ia ki kam sniew kam smeh kiba wan ha ka kyrteng pynioh spah ioh phew ia ngi da ka lynti ka bym hok kum ka kam ri thlen bad ka kam ai ksuid ai khrei bad kiwei kiwei.Kum kata ka bamsap bampong kaba la ktah mationg ia ka ri jongngi. Ki jingsniew kiba bun ngi lah ban la kynduh ha ka jingim jongngi kum ki briew, bad kum ki kam sniew kiba eh ba ngin hap ban ieng ban iada ki long naduh ka kam thok kam shukor, ka sakhi lamler ka kwah rhah spah bym dei ka leh beijot ia ki bym don bor ban iada, ka kam pom pynjot ia ka mariang kaba u Blei u la ai bad ka tih pynjot ia ki lum ki wah bad rkhiang ia ki marpoh khyndew tang ban ioh lum spah ialade. Ngi khlem peit shuh ia ka jingjot ka mei mariang kaba long kum ka kmie kaba ai buin ia ki khun. Lada ngi lah ban ieng ban iada ia ki jingsniew kata ngi la lah ban jop ha kiba bun ki jingeh ba ka ri bad ka jaitbynriew ka ia kynduh na ka por sha ka por. Lada ngi la lah ban pynuh jait ia ki kam sniew kam smeh ngi la lan ban iada ia ka ri bad ka jaitbynriew. Ka jaitbynriew ka kmen haba ym don shuh ki kam sniew kiba pynthoh bria ia ka jinglong shida ka jaitbynriew. Ka jaitbynriew ka roi ka kiew ha baroh ki liang ha bym don shuh ki kam sniew kiba pyntroin ia ka jaitbynriew. Ka jaitbynriew kaba lait na ki jingsniew kata ka long ka jaitbynriew kaba la kyrkhu u Blei. Ieng ban iada ia ka jingsniew ban im ka jaitbynriew.
