Bhubaneswar, Lber:
Ha kaba ïadei bad ka jingïohlad ban pynpulom ïa ka kam beaiñ, ki pulit jong ka Odisha ki la ïohlad ban pynpulom ïa ka jingthmu shalan tuh ïa ki dawai jyrhoh ha Balangir shi bynta jong ka jingpynlong ïa ka “Mission Cough Syrup” Campaign.
Ki pulit jong ka Balangir ki la ïoh ban kem haduh kumba 35 ngut ki briew kiba don bynta ban die bad shalan tuh ïa ki dawai jyrhoh. Ki pulit ki la bynrap shuh shuh da kaba ong ba kiba la shahkem ki la don ïa ki bitor dawai “Eskuf” kaba dei ka dawai jyrhoh ha kaba la kot sha ka T. 35 lak ïa kiba la kurup noh. Ka dawai jyrhoh Eskuf ka don ïa ka Codeine, ka Category C Medication kaba lah ban ktah ïa i khunlung ba dang pun ha kaba la khang pyrshah ban pyndonkam ne dih ïa ka ha ka por ba ki longkmie ki armet.
Katkum ka jingïathuh jong ki pulit, la ong ba u Sana Negi bad u Prashant Kheti ki dei kiba la shah ithuh ba ki la long ki snar nongïalam ha kaba ïadei bad kane ka kam sniew. Ki pulit jong ka Bolangir ki la ong ba kum shi bynta jong ka jingpynlong ïa ka ‘Mission Cough Syrup’ Campaign, kaba la ïakhun pyrshah halor ka jingdon jong ki runar kiba ju die tuh ïa ki dawai jyrhoh, ki la lah ban pynpulom ïa ka jingthmu ka kynhun runar ha ka sngi U Blei.
Kumba la ïathuh u SP jong ka Balangir u Nitin Kushalkar, la ong ba ki pulit ki la lah ban pyntroiñ ïa ka kynhun kaba la don bynta ha ka ban thied beaiñ ïa ki dawai jyrhoh bad die ïa ka dawai Eskuf ha Balangir bad ha ki distrik ba marjan bad la lah ban pynpulom noh ïa kane ka jingthmu pyntreikam naduh Bolangir shaduh West Bengal.
Nalor ki 12,960 tylli ki bitor dawai Eskuf, la ïoh ruh ban kurup kawei ka pistol shna hi, 17 tylli ki Mobile Phone, kawei ka kali Mahindra XUV, ar tylli ki Mahindra Pick UP Van, kawei ka Tata ACE Vehicle, ar tylli ki kali arshaka bad ka pisa kaba T. 7,500, ki jingdeng ksiar bad kiwei pat ki tiar ba bun. Ka pisa kaba T. 2 klur kaba dei jong ka kompeni ba ju shalan mar, ka M/s. Daffodil Drugs Pvt. Ltd, Kolkata, ka la shah kurup, la ïathuh ka tyllong khubor.
