Shillong, Lber 14:
Ka Khasi Students’ Union (KSU) West Jaiñtia Hills District, ka la pyrshah jur halor ka jingkam jong u Myntri Rangbah ka Assam u Himanta Biswa Sarma, ba ka shnong Mukroh ka hap hapoh u pud u sam ka Assam.
Ha ka kyrwoh khubor ba la pyllait da u President ka KSU West Jaiñtia Hills u samla Laitphar Syngkrem u la ong, “Ka seng kam lah ban pdiang ïa ka jingkam jong u Myntri Rangbah ka Assam ba ka Mukroh ka dang hap ha ka West Karbi Anglong, Assam”.
U samla Laitphar u la pynshai ba ka shnong Mukroh ka dei ka jaka kaba pura jong ka West Jaiñtia Hills District naduh ba la pynkha ïa ka Meghalaya ha u snem 1972 haba ong, “Ha kane ka shnong, la shong la sah tang da ki Khasi-Pnar naduh ki por kulong kumah bad ka dei kaba hap ruh hapoh ka Elaka bad Hima Khasi-Pnar”.
Ha kajuh ka por, u la ong ba ka seng ka kyntait ruh ban pdiang ïa ka jingkynnoh u Himanta ba ka jingther kuli jong ki pulit Assam dang shen ha Mukroh ka dei namar ba don ka jingïakynad kaba la mih hapdeng ka Assam Forest Protection Force, ki pulit Assam bad ki nongtuh dieng.
“Kane kam dei ka jingshisha, ha ka jingshisha hi, katkum ka riti ka dustur u Khasi, ka khlaw ka dei jong ka shnong, ne ka Raid ne ka Elaka kaba mut ka dei jong u paidbah ym jong kano kano ka Sorkar. Kumta ha man la ki khlaw ha ka Bri u Hynñiewtrep ki bym hap ha ki kyndon pyrkhing ‘Law Adong, Khloo Blai, ‘Law Shnong, ki nongshong shnong ki lah ban thohdieng katkum ka jingdonkam ka jong ki,” kala ong.
Ka KSU ka la ong ba ki paidbah ha Mukroh ki ju leit thohdieng na ki khlaw jong ka shnong ban pyndonkam ha ka shet ka tiew bad ka dei ka hok ka jong ki paidbah naduh ki por u mynbarim u mynbajah bad ki sorkar khamtam ki sorkar nongwei kim don hok ban kam trai ne tuklar ïa ka nongkynti ki Khasi-Pnar.
Ka KSU ka la pynpaw ruh ba ka jingkam u Myntri Rangbah ka Assam ka long kaba bakla shibun eh bad ka pynpaw ba u kwah kam ei ïa ka khlaw shnong bad ïa ka shnong Mukroh baroh kawei.
“Ki paidbah ka Mukroh ha ryngkat ki paidbah ka West Jaiñtia Hills lem bad ki paid ka Bri U Hynñiewtrep baroh kawei kin ym ailad da lei-lei ruh wat tang shi inshi ka jaka u Khasi kan leit sha Assam,” kala ong.
Namarkata, ka KSU WJHDU ka kyntu ruh ïa ka sorkar Meghalaya ba ka dei ban leh eiei halor katei ka jingkam namar ka pyni ba wat hapdeng ka jingïapynbeit pud ki ar jylla, ka Assam im-im peit-peit ka ïai kam trai beit ïa ki shnong Khasi ha man la ki jaka ba don ha khappud.
