Shillong, Lber 14:
Ki ar ngut shipara lem bad kiwei pat ki nongïalehkai ki la wanrah nam bad burom ïa ka ri India hadien ba ki la lah ban khur ïa ka takma ksiar ha ka World Jeet Kune Do Championship kaba la poi sha kaba kut ha 12 tarik mynta u bnai ha Sri Lanka.
Kine ki kynthup ïa u Francis R.R Songthiang (60 kg) bad ka Lorenza Songthiang (54kg), kiba dei ki khun jong u nongïalam kane ka synjuk ïalehkai ka Jylla u Bah Donny Ranee bad ka Kong Anita Songthiang kiba na Laitkor Kynton-U- Mon.
Kiwei pat ki ‘thei ïalehkai kiba la khur ïa kane ka takma ksiar ki long ka Ribhalin Marbaniang (52kg) kaba dei ka khun jong ka Kong Bianglin Marbaniang na Umkynrud Kynjat Phutbol bad ka Ilawankmen Nongbri (48kg) kaba dei ka khun jong u Liverson Kharnandu na Lawsohtun Block-4.
Na ka liang ka Meghalaya Jeet Kune-Do Association (MJKA) ka la ai khublei ïa kitei ki nongïalehkai kiba la wanrah nam bad burom ïa ka ri hi baroh kawei lyngba ki jingjop jong ki. Te kumta kane ka synjuk ka la pynbeit ba kan leit pdiang burom ïa ki ha ka 17 tarik na Lad Umroi kaba ha Umiam.
