Shillong, Lber 14:
U Bah Disparsing Rani, uba ju wad jingtip ha kane ka Jylla, u la ïathuh ba katkum ka jingïoh jingtip jong u lyngba ka aiñ wad jingtip lyngba ka aiñ (RTI), la lap ba ki la don 10 tylli ki longïing longsem ki bym pat ïoh ïa ka jingsiew ba ki dei ban ïoh hadien ba ki la duh noh ïa ki bahaïing hasem namar ka khlam COVID-19 ha ki snem kiba la dep.
Haba kren sha ki lad pathai khubor ha ka sngi ba-ar, u Bah Disparsing u la ïathuh ba ïa ka jingwad jingtip, u la leh la kham slem, hynrei ïa ka jingtip u dang shu ïoh ha ka 7 tarik Rymphang mynta u snem.
U la ïathuh ba wat hadien ka jingbthah jong ka ïingbishar kaba hakhlieh, kata, ka Supreme Court ha ka 30 tarik Jylliew, 2021, ba ïa ka National Disaster Management Authority lyngba ka State Disaster Response Fund dei ban siew mar T. 50,000 sha ki longïing kiba la khlad noh na ka daw ka khlam COVID-19, hynrei kitei longïing ki khlem pat ïoh satia ïa ka pisa kaba la mang sha ki.
U la ïathuh ba lyngba katei ka jingtip, la lap ba ka Revenue & Disaster Management, ka la dep ban siew haduh T. 6 klur 66 lak sha ki lanot kiba shah lynshop ha ka khlam COVID-19.
“Na ka liang ka Disaster Management jong ka sorkar jylla, ka la pyntip ba ïa ka T. 50,000 la dep ai sha baroh kito ki longïing jong ki briew kiba khlad na u COVID- 19 bad ka pisa baroh kaba la mang sha kitei kiba ïap ka long T.6 klur, 66 lak, hynrei ki don kiba pyntip ba bun bah kim pat ïoh ïa katei ka T.50,000,” la ong u Bah Disparsing.
Shuh shuh u Bah Disparsing u la kyrpad ba ki longïing kiba khlem pat ïoh ïa katei ka jingsiew, ki lah ban pyntip sha u ba un ïoh ban leh ïa kaba donkam namar kiba bun ki longïing ki la pyntip sha u ba kim pat ïoh ïa katei ka pisa kaba ki dei hok ban ïoh.
U Bah Disparsing u la ïathuh ba ki longïing longsem jong kito kiba khlad na ka khlam COVID-19 ki la pynpaw ba ki khlem pat ïoh eiei hadien ba ki la leit ban kam ïa katei ka pisa bad na ka liang ka ophis treikam ka la shu ai daw da kumne da kumtai.
“Ki daw ba ki la ai ki long ba ka tnat kam pat phah ïa ka pisa sha ka account “, la ong u Bah Disparsing.
