Guwahati, Lber:
Haduh 66 ngut ki runar ki la shah pynïap bad 158 ngut kiwei pat ki la shah pynmynsaw ha ki bor pulit jong ka jylla Assam naduh ba u Himanta Biswa Sarma u la shimti ïa ka shuki Myntri Rangbah jong ka jylla ha u bnai Jymmang jong u snem 2021.
Ïa katei ka jinglum jingtip la pynbna da u Myntri Rangbah ka jylla – Himanta Biswa Sarma u ba dei u Myntri ka Tnat Kam Pohïing jong ka jylla. U la pyntip hapoh Ïing Dorbar Thaw Aiñ hadien ka jingshah kylli jingkylli ha u MLA jong ka seng AIUDF – Ashraful Hussain.
Haba ai jingkren ha Ïing Dorbar Thaw Aiñ, na ka liang u Myntri Rangbah u la pyntip ba hapdeng ka 10 tarik u Jymmang jong u snem 2021 tad haduh ka 28 tarik u Rymphang jong u snem 2023 ki la don haduh 35 ngut ki runar ki la shah siat ïap bad 12 ngut kiwei pat ki la shah pynmynsaw na ki jingjia ïather kuli bad ki pulit ka jylla.
U la ïathuh shuh shuh ba ki la don ruh hadu h 26 ngut ki runar kiba la khlad bad 146 ngut kiwei pat kiba la ïoh ïa ki jingmynsaw hadien ka jingshah siat ha ki bor pulit jong ka jylla. U la pyntip ruh ba nalor kitei, ki la don ruh 5 ngut ki runar kiba la khlad shah tynrah kali na ki daw jong ki jingpyrshang phet jyndat hadien ba ki la shah kem.
Ha ka kylla ba la pynlong ban ïatai halor ka ‘Motion of Thanks’, na ka liang u MLa ka AIUDF – Aminul Islam u la bu jingkylli bad ong ba balei ki bor pulit jong ka jylla kim ju lah ban tehlakam halor ki jingjia lait phet jong ki runar; bad ong ruh ba ha man la ka por ba ki runar ki lait phet, ki bor pulit ka jylla ki ju shim beit tang da kawei ka lad ban pynsangeh ïa ki, kata, ban siat ïap/pynmynsaw.
U MLA ka AIUDF u la kynnoh ruh ba ka tnat pulit jong ka jylla ka jur bha ha ka liang ka ‘fake encounter’ bad u Lat ka jylla u dei ban tip bad khmih bniah halor kitei ki kam beaiñ.
