Shillong, Lber 14:
U Bah Sniawbhalang Dhar uba dei u nongïalam ka National People’s Party (NPP) bad ruh u Symbud Myntri Rangbah ka jylla, u la ong ba ka NPP kan hap ban tih bniah ïa ka daw halor ka jingleh sniew jong ka seng ha kane ka ilekshon MLA kaba dang shu dep ha ri-lum Khasi.
Haba kren sha ki nongthoh khubor, u Bah Sniawbhalang u la ong, “Kum ka seng kin sa shong jingïalang hadien da la kut ka Dorbar Mang Tyngka ban wad bad tih ïa ki daw tynrai jong ka jingbym lah ka NPP ban leh bha ha ri-lum Khasi.”
Ha kane ka ilekshon MLA kaba la dep, ka NPP ka la jop tang 8 ngut ki MLA na Ri-lum Khasi-Jaiñtia bad haduh 18 ngut na ri-lum Garo. Ka NPP ka la jop tang 2 ngut ha baroh kawei ka East Khasi Hills, 2 ngut ha Ri-Bhoi bad 4 ngut ha Jaiñtia Hills, katba kam shym la ïoh jingjop sha West Khasi Hills, South West Khasi Hills bad Eastern West Khasi Hills.
U Bah Sniawbhalang u la ong, “Watla ha ri-lum Khasi ka seng kam shym la leh bha, hynrei haba phai sha ri-lum Jaiñtia ka la leh bha namar ngi la kheiñ hapdeng 4 haduh 6 seat. Ngim shym la poi pyrkhat pat ba ha ri-lum Khasi ngin hiar kynsan ka jingjop ki MLA, kaba ngi la khmih lynti ban jop ha kiba bun tylli ki konstitwensi.”
Haba kylli ba hato dei ka jingsngew pyrshah jur u paidbah ïa ka NPP ha ka Ri-lum Khasi, u Bah Sniawbhalang u la ong, “Ka long kaba eh ban ong namar ngim pat tip ïa ka daw tynrai balei ba ngi rem na bun tylli ki konstitwensi ha Ri-lum Khasi. Namarkata, ngin sa tih tynrai ïa ki daw tang mar syn kut ka Dorbar Mang tyngka khnang ba ngin lah ban leh bha ha ka ilekshon ban wan”.
Shuh shuh u Bah Sniawbhalang u la ong ba kawei na ki daw kumba ka la paw hi ka dei namar ba ha rilum Khasi la don bun palat ki seng saiñ pyrthei ba ïakhun ilekshon kata nalor ka NPP, don ka UDP, PDF, TMC, VPP, HSPDP, Congress bad BJP nalor kiwei kiwei.
Haba kynthoh ïa ka jingïakhih ban dawa Myntri Rangbah na rilum Khasi-Jaintia, u Bah Sniawbhalang u la ong, “Ban dawa Myntri Rangbah da u Khasi nga sngew ba ka long kaba bakla namar ngi hap ban burom ïa ka rai u paidbah”.
U ong ba lada ki paidbah ki kwah ba u Myntri Rangbah un dei na ri-lum Khasi Jaintia, ai ba kin vote ïa kawei ka seng ha ka thaiñ.
“Ai ba kin vote tang ïa kawei ka seng na ri-lum Khasi-Jaiñtia. Ki lah ban vote ïa ka UDP ne NPP lada ki kwah, hynrei ki la vote ïa ki seng bapher bapher. Ngan ong aïu shuh,” u la ong.
