Shillong, Lber 14:
U President ka Voice of the People Party (VPP) uba dei ruh u MLA ka Nongkrem u Bah Ardent Basaïawmoit, u la ong ba lada don bun ngut ki kyrtong kiba pan tiket na ka seng VPP yn hap ban shu khalai nusip khnang ban long kaba khuid.
Ïa kine ki kyntien u Bah Ardent u la kren ha ka jingïalang shah pynkupburom ha ki nongkyrshan ha Smit hadien ba u la ïoh jingjop ha ka ilekshon MLA kaba la long ha ka Sngi Ba-ar.
U Bah Ardent u la ong lada don bun ngut ki kyrtong kiba don ïa kajuh ka jinglong ban shakri ïa ka jaidbynriew hap ban shu khalai nusip ïa ka tiket khnang ban nym don ka jingnoh tarajur ïano-ïano ruh.
Nangta u la ai khublei ïa ki paidbah ka Nongkrem konstitwensi namar ki la pynsah jingkynmaw naba dei tang ma u mynta uba la jop lai sien na kane ka konstitwensi.
Nalorkata, u la ong ba na ka jingjop jong saw ngut ki MLA ha kane ka ilekshon ka la pynlong ïa ka VPP ban shah ithuh kum ka State Party ne ka seng riewlum hapoh ka jylla.
U la pynkynmaw ha ka por ba u rem ha ka ilekshon ha u snem 2018, ki nongkyrshan ki la ïam bad ka jaidbynriew ruh ka la ïam lang, hynrei ha kito ki por um kwah ban ong eiei namar ba u dang shu rem.
Shuh shuh u la ïathuh ba don bun ki briew ki la kwah ïa u ban thaw seng thymmai, hynrei um kwah. Ta ka daw u la rung sha ka UDP, nangne pat u la rung sha ka HSPDP bad khatduh haba u la mih na kane ka seng u la thaw ïa ka VPP.
U la ong haba ki stad kheiñ jingkheiñ ha ka ilekshon ki buh nod ne uwei ban jop ha kane ka ilekshon, hynrei baroh ki lyngngoh ba ka VPP ka jop haduh saw ngut ka la pynkulmar lut ïa kito kiba ju kheiñ ha man ba wan ka ilekshon.
