Chennai, Lber:
U Myntri Rangbah jong ka Tamil Nadu u MK Stalin u la phah da ka shithi sha u Myntri Rangbahduh ka Ri u Narendra Modi ha ka lah Sngi U Blei, ha kaba u la kyrpad ïa u ba u la dei ban shim ki sienjam kiba donkam na ka bynta ban pyntikna ha ka ban phah pyllait ïa ki 16 ngut ki nongtong dohkha bad ïa ki 102 tylli ki lieng tongdohkha ba la shah kem bad shah bat ha ki shipai duriaw jong ka Sri Lanka.
U Stalin u la ong ba ka jingkem ïa ki 16 ngut ki nongtong dohkha na Pudukottai bad Nagapattinam ka dei ka jingjia kaba ha ka sien kaba lai kaba la jia halor ka jingthombor bad ka jingkem ïa ki nongthong dohkha jong ka ri India da ki shipai duriaw jong ka Sri Lanka ha une u bnai.
U Stalin u la pan ka jingtuklar na u Myntri Rangbahduh ba un pyntikna ha ka ban ïada ïa ka hok jong ki nongtong dohkha jong ka ri bad ba kum kine ki jingjia kim dei ban jia shuh. Hashwa kane, u Stalin u la dep ban thoh da ka shithi sha u Myntri korbar ri u Jaishankar ha kaba la kyrpad ïa u ba un leh ïa kaba donkam.
“Nga pang ka mynsiem haba nga kren shaphang ki jingïai bteng jong ki kam thombor jong ki nong Sri Lanka. Kumta, nga buh ka jingkyrpad ba ka sorkar India kan shimkhia halor kane bad ban pynkloi ha ka ban ïakren bad ki heh sorkar jong ka Sri Lanka khnang ban lah ban tehlakam bad ban pyntreikam pyrkhing halor kum kine ki jingjia ba la leh da ki nong Sri Lanka, khnang ba kum kine ki kam kin ym wan jia shuh ha ki por ban sa wan,” la ong u Stalin.
