Rourkela, Lber:
Ka long ruh ka sien kaba ar ba ka kynhun ialehkai hockey jong ki shynrang ka ri (India) ka la lah biang sa shisien ban pynliem noh ia ka Germany kaba dei ka lahduh ha ka pyrthei. Kane ka kynhun ialehkai ka ri ka lah pynjem khnap biang sa shisien ia katei ka kynhun da 6-3 kol bad kaba lah kiew mynta sha ka kyrdan ba hajrong ha ka miej khein dor-thong jong ka lympung ialehkai FIH Hockey Pro League.
Haba phai sha ka jingiakhun hapdeng kitei arliang mamla, ka India ka la lah ban khur ia ki kol jong ka lyngba u Abhishek uba la lah ban pynioh ia ki ar kol ha ka minit ialehkai ba 22 bad 51 bad u Selvam Karthi ha ka 24 bad 46 min ialehkai bad kaba lah pynlong ia katei ka kynhun ialehkai hapoh ka jing-ialam jong u Harmanpreet Singh ban khyllie kol biang sa shisien hadien ka jingpynlehnohei ka jong ka ha kaba nyngkong na ka bynta ban khur ia ka jingjop kaba lai sien kynthih na ka lympung.
Ka long ruh ka sien kaba ar ba ka kynhun ka la lah ban pynliem noh ia ka tei ka lahduh ha ka pyrthei ha ki lai sngi ialehkai bad ki jingjop ki lah rah ia ka kynhun sha katei ka kyrdan ha ka miej khein dor-thong da ki san jingjop kata 17 dor-thong. Kumta ka India da 8 ka lah tam shakhmat ia ka Spain da 6 ha ka Goal Difference. Ha ka bynta iakhun kaba nyngkong, ka India ka lah pynliem noh ia ka Germany da 3-2 kol.
Da ka jingkhur jingjop ba thymmai ka jong ka da haduh 5-4 kol pyrshah ia ka Australia, ha ka tei ka jingiakhun bad ka Germany ka India ka lah pynlehnohei ia ka kol kaba kloi tam eh ha ka por ba u Tom Grambusch u lah ai sha ka kynhun jong u ka Germany ia ka jingtam kol shakhmat ha kaba nyngkong ha ka minit ialehkai kaba lai da ka jinglah jong u ban pynkylla sha ka kol na ka PC ba ka kynhun ka ioh ban tied.
Hynrei ka India shen ka lah iohlad ban khyllie lyngba ka kol na u Jugraj Singh uba la lah ban pynkylla ia ka na ka PC ha ka 21 min ialehkai kata ha shuwa ba u Abhishek un nang iai pyndap kol shuh shuh sha ka kynhun.
Kumjuh ruh u Selvam Karthi bad u kapten ka kynhun u Harmanpreet Singh (26min) ki lah pynthikna shuh shuh sha ka kynhun ba ka la lah ban tam ia ka Germany shakhmat da 4-2 ha ka por jong ka jingiashongthait hadien ba lah dep ka jing-iakhun ba mynstep bad katei ka kol ba u Harmanpreet u lah ioh ban kamai biang na ka jingiakhun ka long ka kol ba 11 jong ka aiom ialehkai Pro League kaba mynta.
Na ka bynta ki kol ba ka Germany ka la lah ban kamai haduh kaba kut jong ka jingiakhun ki long na u Gonzalo Peillat (23min da ka PC) bad Malte Hellwig (31min) kiba lah pynioh sha ka kynhun ia ki kol ba shadien na ka bynta ban pynlong ia ka ban lah kamai tang haduh 3 kol.
Ka khubor ka iathuh ruh ba ka jingjop ba khraw tam eh ba ka Germany ka la lah ban khur da bun tylli ki kol ka long ha ka lympung ialehkai Olympic ha usnem 1936 ha Berlin; kata da 8-1 kol. Shuh shuh hadien katei ka jingjop, ka India kan sa pynwai noh ia ka bynta iakhun jong ka ha Rourkela da kaba ioh biang ban iakhun sa shisien bad ka Australia mynta ka sngi (Balang).
