Shillong, Lber 14:
Bun tylli ki aiñ-rew lane Bill, kiba la wanrah da ka Sorkar Pdeng ki dang sahkut ha ki ar tylli ki ïingdorbar ka Parliament, kata, ha Rajya Sabha bad Lok Sabha bad ki don katto katne kiba lah ban ïoh jingmynjur noh ha kane ka Dorbar Mang Tyngka jong ka Parliament kaba la bteng biang mynta.
Ka Dorbar Mang Tyngka jong ka Parliament ka la sdang biang ha ka 13 tarik mynta u bnai bad kan kut ha ka 6 tarik Ïaïong.
Katkum ki jingthoh kiba la buh lypa, la pyni ba ki don kumba 26 tylli ki aiñ-rew (Bill) kiba dang sahkut bad ap ban ïoh jingmynjur da ka Ïingdorbar Rajya Sabha, bad kumba 9 tylli ki aiñ-rew ki dang sahkut bad ap ban ïoh jingmynjur na ka Ïingdorbar Lok Sabha.
Napdeng kiba bun ki aiñ-rew kiba dang sahteng ban ïoh jingmynjur na baroh ar tylli ki Ïingdorbar ka Parliament, ka aiñ-rew kaba dei halor ka jingpynkylla ïa ki kyndon ka Khyrnit Bahynriew (Sixth Schedule) ka dang sahteng haduh mynta.
Ha ka jingshisha, ki MP kiba dei ki dkhot ka Parliamentary Standing Committee ki la dep wan sha Meghalaya bad sha kiwei ki Jylla ha ka Thaiñ Shatei Lam Mihngi ban twad jingmut bad ïasyllok na ka bynta ban sngewthuh shuh shuh haba ïadei bad ka jingpynkylla ïa ka Khyrnit Bahynriew jong ka Riti Synshar ka ri.
Ka Khyrnit Bahynriew ka dei ka aiñ kaba don hapoh ka Riti Synshar ka ri India haba ïadei bad ka jingthaw ïa ki Autonomous Council bad Territorial Council khamtam ha ki Jylla kiba ha kane ka Thaiñ Shatei Lam Mihngi, kum ha Assam, Meghalaya, Tripura bad Mizoram.
Ha Meghalaya ki don lai tylli ki Council kiba kynthup ïa ka Khasi Hills Autonomous District Council (KHADC), Jaiñtia Hills Autonomous District Council (JHADC) bad Garo Hills Autonomous District Council (GHADC).
Ka jingpynkylla ïa ka Khyrnit Bahynriew haba ïadei bad ka Meghalaya, ka dei halor ka jingbsut shuh shuh ïa ki dkhot ha kine ki lai tylli ki Council, nalor ka jingweng ïa ka kyntien ‘District’ bad ka jingpynrung ïa ki kyndon kiba don ha ka Khyrnit Bashiphew (Tenth Schedule); kata ban khang da ka aiñ ïa ka jingkyntiap ki MDC na kawei ka seng saiñ pyrthei sha kawei pat hadien ba ki la dep shahjied.
