Khliehriat, Lber 14:
Tang hadien phra sngi, kata ha ka 6 tarik Lber ba ki pulit jong ka East Jaiñtia Hills ki la ïoh kurup ïa u drok heroin uba khia 75 gram bad kem 3 ngut ki briew, kumta ha ka 14 tarik mynta u bnai ki la ïoh kurup biang sa ïa u kynja bad kem sa ar ngut pat ki bar jylla kiba suba jur ba ki dei nongshalan ïa une mar beaiñ ne ki jingdih ba pynbuaid.
Une u kynja ba la ïoh kurup ki pulit, u khia haduh 71.476 kilo bad la kurup ruh kawei ka kali Maruti (SX4) kaba don u nombor AS01-AN-3312.
Kine ar ngut bar jylla kiba la shah kem ki dei u Babalu Singh (56 snem) na ka shnong Kale Diara Patna bad u Suranjan Mahto (39 snem) na Jahangirpur Bihar.
Ki pulit ki la bat ïa kane ka kali hadien ba ïoh ïa ka jingtip kaba tikna ba don ar ngut ki nongshalan drok kiba ïaid lynti da ka kali Maruti Sx4 kaba don u Registration No. AS01-AN-3312 kiba kit lang ryngkat ïa ki mar beaiñ bad kane ka kali ka ïaid lyngba ka Kalain sha Khliehriat.
Kumta ki pulit mar mar ki la buh ïa ka jaka talasi ne Naka da ka jingïalam ka kynhun pulit ANTF bad ki nongtrei ka Anti-Infiltration Umtyra CP ha ka poi 6 shipawa mynstep.
Kane ka kali kaba wan na Lumshnong ryngkat bad ar ngut ki briew la pakhang lynti bad bat ïa ka bad ha ka jingkhynra la lap ba don ki mar kiba la buhrieh sha ki bynta ba shadien jong ka kali.
Kumta ki pulit ki la kurup ïa kine ki mar katkum ki kyndon jong ka NDPS Act bad la lap haduh 117 song u kynja ba la buhrieh bha na shadien ka kali. Haba test ne shim nongmuna ïa une u mar la pyntikna ba dei u kynja uba don ïa ka jingkhia haduh 71.476 kilo.
Ha kaba ïadei bad kane ka jingjia la pynrung ïa ka case ha thanad Khliehriat bad ka jingtohkit ka la ïaid shakhmat ban lap ksai ïa kiba don bynta ha kane ka kam beaiñ.
