Srinagar, Lber:
Ki pulit jong ka Jammu & Kashmir ha ka lah sngi U Blei ki la lah ban pynpulom bad pyntroiñ ïa ka ktem jong ki lehnoh LeT bad ïoh ruh ban kurup ïa kiba bun ki tiar siat bad pynbthei ha ka thaiñ Rakh Momin jong ka Anantnag distrik kaba don ha South Kashmir.
Ha ka jingthoh ba la phah, u nongaiktien jong ka tnat pulit u la ong ba ha ka miet shiteng synñia jong ka 12 bad ka k13 tarik, jong u Lber hadien ba la ïoh jingtip kaba bniah shapanng ka jingdon jong kine ki lehnoh ba la phah da ki pulit ka Anantnag, ka kynhun ba la ïatreilang bad ka kynhun shipai CASO hua ryngkat ka kynhun shipai 1RR ki la pynlong ïa ka jingleit thwet lehnoh kaba jur ha ka thaiñ Rakh Momin Dangi kaba don ha Bijbehara.
Kumba la ong ka jingthoh, la ïathuh ba ka la don ka jingleit thwet kaba jur ha kane ka thaiñ ha kaba la lah ban pyntroiñ ïa ka kynhun bad ïoh ruh ban pynjulor ïa ka ktem jong ki lehnoh ha kaba la ïoh ban kurup ïa shibun ki tiar siat bad ki tiar pynbthei bad kumjuh kiwei pat ki tiar ba ju pyndonkam ha ka ban hiar thma.
“Ha kaba ïadei bad kane ka jingjia, ka la don ka jingbuh jingujor ejahar jong ka Case FIR No. 58/2023 hapoh ka jaka treikam jong ki pulit ka Bijbehara bad pynngat ha kiba bun ki kyndon aiñ,” la ong ka jingthoh.
Kane ka dei ka jingjia kaba lai ha ka ban ïohlad ban pyntroiñ ïa ka jingthmu bad ïoh ruh ban pynjulor ïa ka ktem jong ki lehnoh da ki shipai ïada ri ha ki 24 kynta ba la leit ha Jammu & Kashmir ha ryngkat ka jingïoh ban kurup ïa kiba bun ki tiar siat bad ki tiar pynbthei bad kumjuh ruh u drok.
