Shillong, Lber 15:
Ka Sorkar Jylla ha ka sngi Balang ka la kular ban shim ïa ki lad ki lynti ban pyllait noh ha ka por kaba dei ïa ka tulop jong ki nonghikai SSA.
Ïa kane ka jingkular la shim ha ka jingïalang ba la khot da u Symbud Myntri Rangbah ka Jylla Bah Prestone Tynsong ha ka jingïadon lang u Myntri ka tnat Pule Puthi u Rakkam A Sangma, ki nongïalam ka Meghalaya Sarva Shiksha Abhiyan Schools Association (MSSASA) lem bad kiwei kiwei.
Haba kren sha ki nongthoh khubor, u Rakkam u la ïathuh ba ka jingïalang ha kane ka sngi ka la ïakren sani ïa ki mat ba la pynsngew da ka synjuk ba kynthup naduh ka jingpyllait ïa ka tulop man ka bnai bad ka arrear ba dang sahteng.
U Rakkam u la ong, “Ngi la pyntip sha ki ba ngi la trei ïa ka kam ban pynbeit ïa kine ki jingeh. Ka tulop jong ki nonghikai SSA kaba dang sahteng ka dei tang ar bnai naba na ka liang jong ka Sorkar ka la dep ban siew ïa ka tulop kaba dei haduh u bnai Nohprah jong u snem ba la leit.”
Shuh shuh u Myntri u la pyntip ruh ba na ka liang ka tnat pule puthi ka dang ap ïa ka Ministry ne ka tnat ba dei khmih ka Sorkar Pdeng ba kan pyllait noh ïa ka ‘Installment’ ba-ar hapoh kine ki 15 sngi ban wan.
Katkum ka jingong jong u, ka Sorkar Jylla kala trei ïa la ka kam bad mynta ka dang ap ïa ka Ministry ban pyllait ïa ka pisa kaba dei ban ai.
Katba na ka liang jong u President ka MSSASA Bah Aristotle C Rymbai pat u la ong ba ka Association kala kyrpad ïa ka Sorkar Jylla ban mang kham bun ha ka mang tyngka ka Jylla na ka bynta ka SSA na ka bynta u snem mang tyngka 2023-2024 ban lah weng noh ïa ka jingeh haba ïadei bad ka jingbym lah siew man ka bnai ïa ka tulop jong ki nonghikai.
U la ong ba kane ka jingkyrpad ka la mih namar ha kiba bun ki khep, ki nonghikai ki la hap ban mih sha surok ban dawa ïa la ka jong ka tulop bad ha kaba u la pynkynmaw ruh ïa ka jingjia ba mynshem snem ha kaba la pynbor ïa ki nonghikai ban thiah ha surok.
U Bah Aristotle u la pyntip ba baroh arngut ki Symbud Myntri Rangbah ka Jylla bad Myntri ka tnat pule puthi, kila ai ka jingkular kaba sngewtynnad ïa ka association.
U la ong ba ki la pyntip sha ka synjuk ba ka Sorkar kan wad ïa ki lad bad ban mang kham bun ka pisa ha ka mang tyngka khnang ba lada wan slem ka pisa na ka Sorkar Pdeng, ka Sorkar Jylla kan lah la kumno kumno ruh ban siew ïa ka tulop jong ki nonghikai SSA na ka bynta lai bnai na ka mang tyngka ka Jylla.
