Imphal, Lber:
Ki dkhot jong 6 tylli ki seng samla pule jong ka jylla Manipur hapoh ka jingïalam jong ka All Manipur Students’ Union (AMSU), ha ka Lah Sngi U Blei mynta ka taiew ki la pynlong da ka jingïakhih ha Imphal ban dawa na ka sorkar ba ka dei ban pyntreikam ïa ka National Register of Citizens (NRC) ha ka jylla, bad kumjuh ruh ban thaw noh ïa ka Manipur State Population Commission.
Ha katei ka sngi, na ka liang ki nongïalam jong kitei ki seng samla pule ki la ïathuh ba ka la don ka jingkiew kaba radbah ha ka liang ka jingdon ki nongshong shnong ha ki thaiñ Rilum jong ka jylla, ka jingjur ha ki kam rep beaiñ ïa ki syntiew poppy bad kumjuh ruh ka jingjur ha ka liang ki kam kyntur pud ïa ki khlaw kiba ïoh jingïada na ka sorkar (reserve forest).
Ha katei ka sngi ba la pynlong ïa ka jingïakhih la ïathuh ba na ka liang ki bor pulit jong ka jylla ki la hap ban pyndonkam ruh da ki lathi ban pynphet krad ïa ki samla kiba la pyrshang ban leit rung jubor sha ka ïing sah jong u Myntri Rangbah ka jylla – N Biren Singh bad thmu ban leit ïaid paidbah ruh shakhmat ka khyrdop ïing jong u Lat ka jylla.
Haba ïakren bad ki lad pathai khubor, na ka liang ki nongïalam jong kitei ki seng samla pule ki la ïathuh ba ka jingwan buhai shnong jong ki paidbynriew na kiwei kiwei ki jylla jong ka ri India bad kumjuh ruh na kiwei kiwei ki ri jong ka pyrthei kum na ka ri Myanmar, Nepal bad Bangladesh ka la wanrah ïa ka jingshah ktah kaba jur ha ka liang ki mat kiba ïadei bad ki riti ki dustur, ka ïoh ka kot, ki rukom synshar khadar jong ka jylla Manipur.
Na ka liang ki nongïalam jong kitei ki seng samla pule ki la dawa ruh na ka sorkar jylla ba ka dei ban shim ïa ki lad ki lynti kiba tyngeh ban leit pynphai ïing noh ïa baroh ki nongshong shnong bar jylla bad bar ri kiba la wan ban shong ban sah beaiñ hapoh u pud u sam jong ka jylla Manipur.
Na ka liang ki nongïalam ki la ïathuh ruh ba kim don ïa kano kano ka jingpyrshah ïa kano kano ka jaitbynriew ne kano kano ka jait niam, hynrei ki kwah ban ïada ïa ki jaka ki puta, ka mariang sawdong sawkud bad kumjuh ruh ban ïada ïa ki nongshong shnong trai muluk jong ka jylla.
Kat kum ki jingïoh lum khubor la ïathuh ba hadien ba la pynlong ïa ka Dorbar jong ka Sorkar Jylla ha u snem ba la dep la thaw wanrah ruh ïa ka ‘resolution’ ban thaw ïa ka ‘population commission’ ha ka jylla Manipur, bad na ka liang ka Kynhun Myntri ka la mynjur ruh ban thaw ïa ka Manipur State Population Commission. Hynrei la ïathuh ba tad haduh kane ka kynti kaba mynta ym pat shym la lah satia ban pynsdang trei kam ïa katei ka ‘commission’.
