Lausanne, Lber:
Ka Court of Arbitration for Sports (CAS) ha ka jingpynbna khubor ka jong ka, ka iathuh ba ia ka jingsospon ialehkai kaba saw snem kynthih sha u rang-ialehkai Gymnastic ka ri Ukraine bad u lahduh Olympic barim u Oleg Verniaiev, uba lah shah sospon namar ki kam dih dawai khleh droks, lah pynsynjor noh mynta na ka saw sha ka ar snem.
Shuh shuh ka khubor ka iathuh ruh ba ka CAS ka lah shim ia ka tei ka bynta ha ka ban weng noh ia ka jingsospon kaba jlan snem pyrshah ia u da kaba pynduna noh ia ka sha kattei ka snem. Kumta u Verniaiev; uba lah khur ia ka jingjop ha ka Parallel Bars da ka takma Ksiar ha ka Rio Olympic 2016 bad kumjuh ruh ia ka takma Rupa ha ka All-Around, u lah shah kyntait noh na ka bynta ban iada bad pynneh halade ia katei ka khusnam ha ka jingshimbynta ka jong u sa ha ka Tokyo Olympic, hadien ba ka jingleh ia ka jingpeitbniah ia ka nongmuna ka jong u, la lap ba u lah dih ia u dawai ba lah shah khang u Meldonium ha u bnai Nailar 2020. Shuh shuh ruh ka jingpynshitom kaba nyngkong da saw snem ka lah ruh ban kyntiat na ka bynta ban shimbynta ha ki jingiakhun ha ka Paris Olympic 2024, hynrei u rangialehkai ba 29 snem u iathuh bai a ka jingioh ban dih ia utei u dawai ka long hadien ba um shym la tip eiei ba lah khlehlang ha ki jingbam.
Ha ka jingpynsngew paidbah ha u bnai Nohprah 2022, ka kynhhun tohkit ka lah iai pynneh ia ka jingpykhein ka jong u ia ka kyndon Anti-Doping, hynrei kaba lah pynkut pat ba ki don kiwei pat ki bynta, ki lad ki lynti na ka bynta ban pynduna ia ka jingpynshitom. Kumta naba ka jingpynshitom ka sdang naduh ka 5 tarik u Naiwieng 2020, kumta ruh u Verniaiev mynta u long ruh uba lah ioh jingbit bad thikna na ka bynta ban shimbynta ha kino kino ki lympung iakhun. U dawai Meldonium u long u jait dawai na ka bynta ban ai ka jingsumar sha kiba don ka jingpang shini bad kiba dun ka Magnesium, ha kaba la lap ia u ha kiba bun ki nongialehkai ha ki snem ba lah leit noh.
