Shillong Lber 15:
U Myntri ka Sorkar Jylla, u Bah AL Hek uba dei ruh uwei na ki nongïalam ka BJP ha Meghalaya, u la ïakynduh ïa u nongïalam ka BJP ha New Delhi ban ïakren shaphang ka jingpynkhreh ïa ka ilekshon sha ïingdorbar Lok Sabha, ha kaba u la shim ruh ka lad ban ïakynduh ïa ki katto katne ngut ki Myntri ka Sorkar Pdeng.
U Bah Hek, u la ïakynduh nyngkong ïa u National General Secretary (Organisation) u B L Santhosh ha New Delhi ha kaba u la ïakren shaphang ka jinglong jingman ka BJP ha Meghalaya, bad ka jingpynkhreh ïa ka ilekshon sha ka ïingdorbar Lok Shabha ha u snem 2024.
Hadien ba la dep ïakren shaphang ki kam kiba dei jong ka seng, u Bah Hek u la leit ïakynduh sa ïa ki katto katne ngut ki Myntri ka Sorkar Pdeng kiba kynthup ïa u Myntri khynnah (uba khmih laitluid) ïa ki tnat treikam ka Sorkar Pdeng, u Dr Jitendra Singhji ha ïingsah jong u bad u la ïakren shibun ki bynta kiba dei shaphang ki kam pynroi ha Meghalaya.
U Bah Hek u la ïakynduh ïa u Myntri ka Sorkar Pdeng uba khmih ïa ka tnat jngohkai pyrthei bad DONER u Kishan Reddy ha kamra treikam jong u ha New Delhi, ha kaba la ïatai ruh kumno ban kyntiew ïa ka Eco-Tourism-cum-Fish sanctuary ha Meghalaya bad ruh ban kyntiew ïa ka Model Rural Tourism Village Cluster Development ka ban long ka lad ïoh kam bad ka ban khring ruh ïa ki nongjngohkai kiba wan sha nongkyndong, nalor ka jingkyntiew ïa ka kam jngohkai pyrthei ha ka liang ka koit ka khiah lyngba ka jingpyndonkam ïa ki dawai kynbat.
