Mumbai:
Hadien jong ka Kangana Ranaut ka Alia Bhatt ruh ka la shim ia ka lad ban ai jingiaroh ia la ka jong ka paralok ka Deepika Padukone ha ka jingleit shim bynta ha ka Oscars Awards ha kaba nalor ka Deepika ka Alia ka la pynpaw ruh ka jingsngewkmen halor ka jingioh pdiang khusnam ka Naatu Naatu bad ka Elephant Whisperer.
Ka Alia kaba long ka paralok ba iajan bha bad ka Deepika ka dap da ka jingsngewkmen halor jong ka ba ka la mih khmat na ka bynta ka India ha katei ka rynsan bad kumjuh ruh ka jingnang jong ka ban pynbna ia ka Naatu Naatu.
Kum ka puron ka Alia ka sngewkmen eh ba artylli ki phlim na India ki la wanrah burom hadien ba ki la iohpdiang khusnam bad kyrmen skh em ruh ba ha ki snem ban wan kiwei kiwei ki phlim kin dang wanrah nam bad burom biang ia kane ka ri.
Ha khmat jong ka Alia ka sngewthuh kumno ka long ia ka Deepika ban ieng ha rynsan ban pynbna ia ka Naatu Naatu hynrei kane ka puron khlem kano kano ka jingsngew salia ne jinglehrain ka la pyndep ia ka kamram jong ka ban pynbna ia katei ka phlim.Kawei kaba ka Alia ka la ai jingiaroh ruh ia ka Deepika ka dei ka riam ka beit ba ka la phong sha katei ka jingsam khusnam.
Nalor ka Alia wat ka puron jong ka Tollywood ka Samantha Ruth Prabhu ruh ka la iaroh bha ia ka Deepika ha kaba iadei bad ka jingnang jong ka ban pynbna ia ka Naatu Naatu ha ka Oscars bad sngew ba ka jingshah jied ruh jong ka ban long ka nongpynbna ha katei ka jingsam khusnam ka long kaei kaei kaba ki nongshong shnong ka India ki da sngew khyllew haduh katta katta.
